თეთრი სახლის მიერ გავრცელებული განცხადებების მიხედვით, საუდის არაბეთში 23-25 მარტს გამართული მოლაპარაკებების შემდეგ, უკრაინა და რუსეთი თანახმა არიან, შავ ზღვაში უსაფრთხო მიმოსვლა აღდგეს, შეწყვიტონ ძალის გამოყენება და აღკვეთონ სამხედრო მიზნებისთვის სავაჭრო გემების გამოყენება.

თეთრმა სახლმა უკრაინასა და რუსეთთან საზღვაო და ენერგეტიკულ შეტევებზე ცალ-ცალკე დადო შეთანხმებები. განცხადებებში ნათქვამია, რომ ვაშინგტონი, კიევი და მოსკოვი "ენერგეტიკისა და საზღვაო ხელშეკრულებების განხორციელების მხარდაჭერაში" მესამე ქვეყნების ჩართულობას მიესალმებიან.

კრემლის პირობა

კრემლის განცხადებით, რუსეთი შეთანხმების ძალაში შესვლას მას შემდეგ დათანხმდება, რაც რუსულ ბანკებს დასავლეთის ფინანსურ სანქციები მოეხსნება და ფინანსურ სისტემა SWIFT-ში დაბრუნება შეეძლება.

რუსეთი ითხოვს Russian Agricultural Bank-ის მიმართ სანქციების მოხსნას. ამავდროულად, რუსეთი მოითხოვს შეზღუდვების მოხსნას სავაჭრო ფინანსურ ოპერაციებზე და სანქციების მოხსნას იმ კომპანიებზე, რომლებიც აწარმოებენ და ექსპორტზე გააქვთ საკვები პროდუქცია და სასუქები.

რუსეთის საგარეო საქმეთა მინისტრ, სერგეი ლავროვის განცხადებით, უკრაინის პრეზიდენტ ვოლოდიმირ ზელენსკის ვერ ენდობიან და, შესაბამისად, შავ ზღვაზე შეთანხმებას მხოლოდ იმ შემთხვევაში მოაწერენ ხელს, თუ აშშ უკრაინას "უბრძანებს", შეთანხმებას პატივი სცეს.

"ჩვენ გვჭირდება ნათელი გარანტიები. და მხოლოდ კიევთან შეთანხმებების მხრივ სამწუხარო გამოცდილებიდან გამომდინარე, გარანტიები შესაძლებელია, მხოლოდ ზელენსკისა და მისი გუნდის მიმართ ვაშინგტონის მხრიდან ბრძანების შედეგი იყოს, რომ ერთი რამ გააკეთონ, და არა — მეორე", — თქვა რუსეთის საგარეო საქმეთა მინისტრმა სერგეი ლავროვმა.

უკრაინის პირობა

ვოლოდიმირ ზელენსკიმ განაცხადა, რომ შავ ზღვასა და ენერგეტიკის ინფრასტრუქტურაზე ცეცხლის შეწყვეტის შეთანხმება დაუყოვნებლივ შედის ძალაში და პუტინი გააფრთხილა, რომ იგი აშშ-ს პრეზიდენტს რუსეთზე ახალი სანქციების დაწესებასა და უკრაინისთვის შეიარაღების მიწოდებას სთხოვს იმ შემთხვევაში, თუ რუსული მხარე შეთანხმებას დაარღვევს.

"თუ რუსები დაარღვევენ ამას [ცეცხლის შეწყვეტის შეთანხმებას], მაშინ მე პირდაპირი თხოვნა მექნება პრეზიდენტი ტრამპისთვის. თუ ისინი დაარღვევენ, აქ არის მტკიცებულება - ჩვენ ვითხოვთ სანქციებს, ჩვენ ვითხოვთ შეიარაღებას" — განაცხადა უკრაინის პრეზიდენტმა ვოლოდიმირ ზელენსკიმ.

თეთრი სახლის მიერ გავრცელებული განცხადებას ცეცხლის შეწყვეტის შესახებ, უკრაინის თავდაცვის მინისტრი, რუსტემ უმეროვიც ადასტურებს.

უმეროვმა X-ზე განაცხადა, რომ უკრაინული მხარე ხაზს უსვამს, რომ შავი ზღვის აღმოსავლეთ ნაწილის მიღმა რუსეთის მხრიდან საკუთარი სამხედრო ხომალდების ნებისმიერი სახით გადაადგილება, შეთანხმების დარღვევად ჩაითვლება.

აშშ-სა და უკრაინის მხარე ასევე შეთანხმდნენ, რომ აშშ ერთგული რჩება, დაეხმაროს უკრაინას ომის ტყვეების გაცვლაში, დაკავებული მოქალაქეების გამოშვებაში და ძალით რუსეთში გადაყვანილი უკრაინელი ბავშვების უკან დაბრუნებაში.

შეგახსენებთ, 24 მარტს საუდის არაბეთში აშშ-ისა და რუსეთის დელეგაციებს შორის მოლაპარაკებები მიმდინარეობდა, რომელიც 12 საათი გაგრძელდა. Reuters ცნობით, მოლაპარაკებები რუსეთსა და შეერთებულ შტატებს შორის, სხვა საკითხებთან ერთად, შავ ზღვაში ცეცხლის შეწყვეტის შესახებ შეთანხმების მიღწევის მცდელობებს მიეძღვნა.