საქართველოს პარლამენტის წევრის, სალომე სამადაშვილის განცხადებით, ისინი ნაციონალური მოძრაობის თავმჯდომარის, ნიკა მელიას აზრს იზიარებენ და ამ საკითხზე მედიატორებთანაც ექნებათ მსჯელობა.

"არსებობს შეთანხმება, რომელიც არის ხელმოწერილი როგორც მხარეებს შორის, ასევე, ეს არის დოკუმენტი, რომელიც არის ევროკავშირის მედიაციით მიღწეული. ამიტომ ჩვენ, ცხადია, პატივს ვცემთ და ვიზიარებთ ნიკას აზრს, ამაზე გვექნება შესაბამისი მსჯელობა, მათ შორის, მედიატორებთანაც და ვნახოთ, როგორ განვითარდება მოვლენებ", — თქვა მან.

დღეს, 26 აპრილს ნაციონალური მოძრაობის თავმჯდომარემ, ნიკა მელიამ განცხადება გაავრცელა, სადაც ის მზადყოფნას გამოთქვამს ევროკავშირის მიერ გადახდილი გირაოთი გათავისუფლებაზე, იმ შემთხვევაში, თუ ამნისტიის კანონს უკან გაითხოვენ.

დოკუმენტში, რომელიც ევროპული საბჭოს პრეზიდენტის, შარლ მიშელის ინიციატივით შემუშავდა წერია, რომ მხარეებმა ხელმოწერიდან ერთი კვირის ვადაში, "პოლიტიზებულ მართლმსაჯულებად" აღქმულ ორ საკითხზე რეაგირება უნდა მოახდინონ ამნისტიის საშუალებით და/ან ისეთი ზომების მიღებით, რომელიც ანალოგიურ შედეგს გამოიღებს.

ამნისტიის საკითხს მოყვა არაერთი კითხვა იმაზე, თუ ვის შეეხება ეს კანონი. კერძოდ, სამოქალაქო საზოგადოებისა და ოპოზიციის ნაწილი წინააღმდეგია, რომ ის გავრცელდეს სამართალდამცავები უწყების წარმომადგენლებზეც, რომლებიც აქციის დაშლაში მონაწილეობდნენ. პარლამენტის თავმჯდომარის, არჩილ თალაკვაძის განცხადებით, ამნისტიის კანონი ზუსტად იმ პირობებით მიიღება, რაც შეთანხმებაშია. მისი თქმით, ქართულ ოცნებას ამ საკითხზე "არავითარი სუბიექტური ინტერესი" არ გააჩნია.

27 აპრილს, სამშაბათს, ოპოზიცია პარლამენტში შევა იმისთვის, რომ ამნისტიის შესახებ კანონი დაარეგისტრიროს. ამნისტია შეეხება ნაციონალური მოძრაობის თავმჯდომარეს, ნიკა მელიას. პროექტის დარეგისტრირების შემდეგ, ამავე დღეს პრეზიდენტი გიორგი რურუას შეწყალების აქტს გამოსცემს.

გაიგეთ მეტი: