თურქეთმა უარყოფითად შეაფასა აშშ-ის პრეზიდენტის, ჯო ბაიდენის მიერ სომეხთა გენოციდის აღიარება და ისტორიული მოვლენების არასწორად ინტერპრეტაციის მცდელობა უწოდა. პარტნიორ ქვეყანას მხარდაჭერა გამოუცხადა აზერბაიჯანმაც და განაცხადა, რომ ისტორიის ფალსიფიკაცია მიუღებელია.

თურქეთის საგარეო საქმეთა სამინისტროს განცხადებაში აღნიშნულია, რომ ეს გადაწყვეტილება აშშ-მ რადიკალური სომეხი წრეებისა და ანტითურქული დაჯგუფებების გამო მიიღო. მათი თქმით, 1915 წლის მოვლენები არ აკმაყოფილებს არცერთ პირობას, რომელიც საჭიროა გენოციდის განსაზღვრებისთვის.

თურქეთს საგარეო საქმეთა მინისტრმა ეს ფაქტი პოპულიზმადაც შეაფასა განაცხადა, რომ ვერავინ ასწავლით საკუთარ ისტორიას. მისივე თქმით, პოლიტიკური ოპორტუნიზმი მშვიდობისა და სამართლიანობის უდიდესი ღალატია.

აზერბაიჯანის საგარეო საქმეთა მინისტრმა, ჯეიჰუნ ბაირამოვმა განაცხადა, რომ ესაუბრა მის თურ კოლეგას, რომელსაც ძმად მოიხსენიებს და განიხილეს "მოვლენების დამახინჯების" საკითხი. მისი თქმით, ისტორიის გადაწერის მცდელობა პოლიტიკური მიზნებისთვის, დაუშვებელია.

Anadolu Agency-ის ინფორმაციით, მომხდარზე თურქეთის პრეზიდენტი, რეჯებ თაიფ ერდოღანი აზერბაიჯანელ კოლეგას, ილჰამ ალიევს ესაუბრა და მათ ბაიდენის გადაწყვეტილება ერთხმად დაგმეს.

ალიევმა აღნიშნა, რომ ბაიდენის საქციელი მიუღებელია და ეს დააზარალებს თანამშრომლობას რეგიონში. მანვე კიდევ ერთხელ გაუსვა ხაზი იმას, რომ ბაქო ყოველთვის ანკარის გვერდით იქნება.

აშშ-ის პრეზიდენტმა, ჯო ბაიდენმა სომეხთა გენოციდი აღიარა. აშშ-ის პრეზიდენტის განცხადებით, სომეხი ხალხის ტკივილს ხედავენ, პატივს სცემენ და ადასტურებენ ისტორიას, არა იმისთვის, რომ ვინმე დაადანაშაულონ, არამედ იმისთვის, რომ მსგავსი რამ აღარ განმეორდეს.

"ყოველ წელს ამ დღეს ჩვენ ვიხსენებთ იმ ადამიანების სიცოცხლეს, ვინც ოსმალეთის ეპოქის დროს მომხდარ სომეხთა გონეციდს ემსხვერპლა", — წერია ბაიდენის განცხადებაში.

1915 წლის 24 აპრილს სტამბულში სომხეთის ინტელიგენციის 800 წარმომადგენელი ჯერ დააპატიმრეს, შემდეგ კი დახოცეს. ამის შემდეგ დაიწყო ეთნიკური სომხების მასობრივი მკვლელობები და დეპორტაცია, რის შედეგადაც მილიონნახევარი ადამიანი დაიღუპა.

სომეხთა გენოციდის ფაქტი პირველმა ოფიციალურად 1965 წელს აღიარა ურუგვაიმ, მას შემდეგ, აღიარებას კიდევ 21 ქვეყანა შეუერთდა, მათ შორის, საფრანგეთი, გერმანია, იტალია, რუსეთი და კანადა.

2009 წელს, სომეხთა გენოციდი ასევე აღიარეს ავსტრალიამ და შვედეთმა. თურქეთი და თურქული ისტორიოგრაფია ოსმალეთის იმპერიაში სომხური მოსახლეობის მიზანმიმართული განადგურების ფაქტს დღემდე კატეგორიულად უარყოფს.

თურქეთი კატეგორიულად ეწინააღმდეგება, რომ ოსმალეთის იმპერიაში 1915-1918 წლებში მიმდინარე მოვლენებს გენოციდი დაერქვას. სომხეთი კი აგრძელებს მსოფლიოს ქვეყნებისადმი მოწოდებას. საქართველოში მცხოვრები სომხები ყოველწლიურად მართავენ აქციებს და მოითხოვენ ხელისუფლებისგან გენოციდის აღიარებას.