ოთხფეხა მეგობრების პატრონებს კარგად მოეხსენებათ, რას ნიშნავს ბეწვის გორგალთან ჩახუტება. ისიც იციან, რატომ არის საჭირო ცხოველის ბეწვის მუდმივი მოვლა და მისი დავარცხნა, რომელიც, რა თქმა უნდა, ბღუჯების მოგროვებით სრულდება.

თუმცა, ბღუჯებსაც შეიძლება სარგებელი გამოეძებნოს.

გაზაფხულზე, როცა ჩვენი შინაური ცხოველები ბეწვს იცვლიან, ჩიტების უმეტესობა კი ბუდის კეთებას იწყებს, ბევრ ადამიანს უჩნდება სურვილი, თავადაც დაეხმაროს ფრინველებს ახალსახლობაში; განსაკუთრებით მაშინ, თუკი ჩიტს ეს საქმე ძალიან ეზარება.

ამიტომ, მნიშვნელოვანია, ვიცოდეთ, რა მივაწოდოთ ფრინველებს და რა — არა.

შინაური ცხოველების ბეწვი ჩიტებისთვის მშვენიერი საშენი მასალაა. ძაღლების ბეწვი ძალიან თბილია და მალე შრება. ასე რომ, შეგიძლიათ, თქვენი ოთხფეხა მეგობრის მომდევნო დავარცხნისას ეს გაითვალისწინოთ; მათი მოგროვებული ბეწვის დატოვება გარეთ, ჩიტებისთვის ხელმისაწვდომ ადგილას შეიძლება — სასურველია, სიმაღლეზე ჩამოკიდებული იყოს, რათა ისინი სამეზობლოს კატების საკბილო არ გახდნენ.

მნიშვნელოვანია, რომ ბეწვი ქიმიურად დამუშავებული არ იყოს (მაგალითად, რწყილების ან ტკიპების საწინააღმდეგო სითხით), რადგან ეს დიდ საფრთხეს უქმნის ჩიტების სიცოცხლეს.

ფოტო: My Brown Newfies

"ამის სერიოზულად კეთება 1990-იან წლებში დავიწყე, როცა სქელბეწვიანი კატა ავიყვანე", — იხსენებს ბლოგერი დაგლას მორენი, — "გაზაფხულზე, ბეწვი რომ სცვიოდა, ბაღში გამყავდა და ვვარცხნიდი ხოლმე. მალევე შევამჩნიე, რომ რამდენიმე მეტრის მოშორებით ბეწვის ხელში ჩასაგდებად ჩიტების ბრძოლა იმართებოდა: ზოგი ჰაერშივე იჭერდა, ზოგიც იცდიდა და ბალახზე მოდებულს იღებდა. ერთი წივწივა იმდენად ცდილობდა, არაფერი გამორჩენოდა, რომ უფრო მეტს და მეტს ავლებდა ნისკარტს, თუმცა 3 მეტრში მდებარე მისი ბუდე უკვე სავსე იყო.

"ჩემს ერთ მეზობელს თეთრბეწვიანი ლაბრადორი ჰყავდა. ბუდობის სეზონის შემდეგ მის შვილებს ჩიტის სამოსახლო ვაჩვენე. გაოცებულები იყვნენ, როცა ბუდეში მათი ძაღლის ბეწვი შეამჩნიეს".

ბუდე ძაღლის ჩაფენილი ბეწვით.

ფოტო: u/paulfknwalsh / Reddit

რადგან გავერკვიეთ, რა დანიშნულება შეიძლება მივცეთ ჩვენი ბეწვიანი მეგობრების გორგლებს, დროა, ისიც გავიგოთ, რა არ გამოდგება ჩიტების ბუდეების ასაშენებლად.

ნუ მიაწოდებთ ჩიტებს ძაფებს, თოკებს, ზონრებს და ადამიანის თმას — ეს მასალა ყოველწლიურად უამრავი ჩიტის დაშავების და ხშირად სიკვდილის მიზეზიც კი ხდება.

ველური ბუნების ეროვნული ფედერაციის რეკომენდაციით, უფრო უსაფრთხო ალტერნატივებია: პატარა, 10 სანტიმეტრზე მოკლე ტოტები, ფოთლები, ტალახი (მერცხლების, ნამგალებისა და შაშვებისთვის), გამომშრალი ბალახი (ბეღურებისა და შაშვებისთვის) და ხავსი (ზოგიერთი მგალობელი ჩიტისთვის).