საპროცედურო საკითხთა და წესების კომიტეტის თავმჯდომარე, ირაკლი ქადაგიშვილი ვარაუდობს, რომ იმ პარტიებში, რომლებმაც შეთანხმების დოკუმენტს ხელი არ მოაწერეს, არიან ადამიანები, ვინც ფიქრობს, რომ "უკიდურესად მარგინალური პოზიციის დაკავება არის დამაზიანებელი".

"ვინც ხელი არ მოაწერა, მე ვფიქრობ, რომ ალბათ, იქაც კიდევ არიან ადამიანები, ვინც ფიქრობენ, რომ დღეს, უკიდურესად მარგინალური პოზიციის დაკავება არის დამაზიანებელი იმ პოლიტიკური ძალებისა. ანუ, რა ნაბიჯიც გადადგა ქალბატონმა სალომემ [სამადაშვილმა], შეიძლება ამ ნაბიჯის გადადგმის სურვილი და ნებისყოფა სხვასაც აღმოაჩნდეს", — განაცხადა ქადაგიშვილმა.

მისი თქმით, შეთანხმების დოკუმენტზე ინდივიდუალურად ხელმოწერის შემდეგ სალომე სამადაშვილის მიმართ გამოხატული განწყობები არის მისი დასჯა.

"როდესაც ლაპარაკი არის გარკვეული პოლიტიკური პარტიების მხრიდან, რომ მათი პოლიტიკური დღის წესრიგი ნიშნავს უპირობოდ ამოშანთვას რაღაცისას, უპირობოდ გაძევებას ვიღაცისას, უპირობოდ, ასე ვთქვათ, მხოლოდ და მხოლოდ დესტრუქციული, უკიდურესად დესტრუქციული დღის წესრიგით ხელისუფლების ხელში ჩაგდებას, რა თქმა უნდა, აი ასეთ მდგომარეობაში ნებისმიერ საღი აზრის გამოვლინებაც კი არის დასჯადი. დასჯადი არის ყველა იმ მეთოდით, რა მეთოდიც მათ ხელთ უპყრიათ", — განაცხადა ქადაგიშვილმა.

სალომე სამადაშვილმა ევროპული საბჭოს პრეზიდენტის, შარლ მიშელის ეგიდით შექმნილ ახალ დოკუმენტს ხელი ინდივიდუალურად მოაწერა. ნაციონალური მოძრაობა დოკუმენტზე ხელმოწერისგან უარს ამბობს მანამ, სანამ პარტიის თავმჯდომარე, ნიკა მელია ციხეშია.

19 აპრილს ევროპული საბჭოს პრეზიდენტის, შარლ მიშელის ახალ დოკუმენტს შვიდმა პოლიტიკურმა პარტიამ და ორმა დამოუკიდებელმა დეპუტატმა მოაწერა ხელი. ხელმოწერის ცერემონია პრეზიდენტის სასახლეში გაიმართა. ხელმოწერის ცერემონიას ონლაინ დაესწრო შარლ მიშელიც.

ამ დროის მონაცემებით, დოკუმენტს ხელს აწერენ: ქართული ოცნება, ლელო, სტრატეგია აღმაშენებელი, ორივე გირჩი, რესპუბლიკური პარტია, ასევე, ინდივიდუალურად აწერენ ხელს ნაციონალური მოძრაობის ერთ-ერთი ლიდერი, სალომე სამადაშვილი და ევროპული საქართველოს ყოფილი თავმჯდომარე, დავით ბაქრაძე. 20 აპრილს ხელი მოაწერა ევროპული საქართველოს ერთ-ერთმა წევრმა, არმაზ ახვლედიანმაც.

ახალ დოკუმენტში საუბარია ე.წ. პოლიტპატიმრებზეც. კერძოდ, საუბარია იმაზე, რომ დოკუმენტის ხელმოწერიდან 1 კვირის განმავლობაში ორ შემთხვევაში, იგულისხმება ნიკა მელიასა და გიორგი რურუას საქმეები, იქნება ამნისტია ან სხვა ნაბიჯი, რომელსაც ანალოგიური შედეგი ექნება. საუბარია ამნისტიის კანონზეც, რომელიც 2019 წლის 20 ივნისის აქციებს ეხება. პარტიები ცვლილებების მხარდასაჭერად პარლამენტში უნდა შევიდნენ.

გარდა ამისა, დოკუმენტში საუბარია საარჩევნო რეფორმაზე, სადაც ვადამდელ არჩევნებთან დაკავშირებით ქართული ოცნების წინადადება გაზიარებულია, თუმცა ნაცვლად 40%-სა, შემოთავაზებულია 43%. კერძოდ, ვადამდელი არჩევნები ჩატარდება 2022 წელს, თუ 2021 წლის თვითმმართველობის არჩევნებში მმართველი პარტია 43%-ზე ნაკლებ პროპორციულ ხმას აიღებს.

დოკუმენტი მოიცავს სასამართლო რეფორმას, პარლამენტში ძალაუფლების გადანაწილებასა და მომავალ არჩევნებსაც.