ნაციონალური მოძრაობის ერთ-ერთი ლიდერი, აკაკი მინაშვილი აცხადებს, რომ პარტიის კიდევ ერთი ლიდერის, სალომე სამადაშვილის გადაწყვეტილებაზე, დამოუკიდებლად მოეწერა ხელი შარლ მიშელის ახალი დოკუმენტისთვის, პოლიტსაბჭო იმსჯელებს. ამის შესახებ მან მთავარი არხის ეთერში ისაუბრა.

"ნაციონალურმა მოძრაობამ არ მოაწერა ხელი ამ დოკუმენტს და სალომე სამადაშვილი, რომელიც იქ არის ახლა წარმოდგენილი, ინდივიდუალურად აწერს ხელს, როგორც შესული პარლამენტარი და ეს ეწინააღმდეგება იმ დისკუსიას, რომელიც ჩვენ გვქონდა პოლიტსაბჭოში დღეს და იმ შუალედურ გადაწყვეტილებას და ეს არის პარტიის პოზიციის წინააღმდეგ. [...] ამასთან დაკავშირებით პოლიტსაბჭო იმსჯელებს", — განაცხადა მინაშვილმა.

მისი თქმით, ნაციონალური მოძრაობის პოზიცია არ შეცვლილა და პარტია კვლავ დარწმუნებულია, რომ ეს დოკუმენტი არ არის საუკეთესო გზა ქვეყნის რთული ვითარებიდან გამოყვანისთვის. კერძოდ, ენმ-ს "წუხილები" აქვს ამნისტიის კანონთან, ვადამდელ არჩევნებთან და იმასთან, რომ დოკუმენტში არ წერია ცესკოს ხელმძღვანელის ცვლილება.

ამასთან, აკაკი მინაშვილმა აღნიშნა, რომ სანამ ნიკა მელია არ იქნება თავისუფალი, შემდგომი მოლაპარაკებების სივრცე არის "ძალიან შეზღუდული".

"ჩვენი უმთავრესი მიზანია მელია იყოს გარეთ და ის უნდა იყოს ხელმომწერი. საერთო გადაწყვეტილება პოლიტსაბჭოში იყო ის, რომ ნებისმიერ ტიპის შემდგომი მოლაპარაკება უნდა იყოს იმ შემთხვევაში, თუ ნიკა მელია არის გათავისუფლებული", — თქვა მინაშვილმა.

შეგახსნეებთ, რომ სალომე სამადაშვილმა შარლ მიშელის ახალ დოკუმენტს სხვა ოპოზიციურ პარტიებთან ერთად ინდივიდუალურად მოაწერა ხელი. წინადადებას აქვს ევროპული საქართველოს ყოფილი თავმჯდომარის, დავით ბაქრაძის ინდივიდუალური ხელმოწერაც. ეს ორი პარტია დოკუმენტის გარკვეულ ნაწილებს არ ეთანხმება. მაგალითად, ევროპული საქართველოს კრიტიკას არჩევნების ნაწილი იმსახურებს, რომელიც გულისხმობს რიგგარეშე არჩევნებს მხოლოდ იმ შემთხვევაში, თუ თვითმმართველობის არჩევნებზე ქართული ოცნება 43%-ზე მეტს ვერ აირებს. რაც შეეხება ნაციონალურ მოძროაბას, ამ პუნქტთან ერთად, მათ არ მოსწონთ ამნისტიის შესახებ კანონიც, რომელშიც ზუსტად არ არის მითითებული, შეეხება თუ არა ამნისტია 20 ივნისის საქმეზე ბრალდებულ სამართალდამცავებს.

დოკუმენტს ხელს არ აწერს ლეიბორიტული პარტიაც, ხოლო ხელმომწერები არიან: ქართული ოცნება, ლელო, სტრატეგია აღმაშენებელი, რესპუბლიკური პარტია, გირჩი, გირჩი — მეტი თავისუფლება და მოქალაქეები.