მსახიობ ნინუცა მაყაშვილის და რუსკა მაყაშვილი ამბობს, რომ ბესო ზანგური არის, იყო და იქნება მუდამ მოძალადე. მისივე თქმით, მნიშვნელობა არ აქვს რამდენი ხნის წინ მოხდა ძალადობა, მოძალადე უნდა ამხილო.

"ძალიან რთულია ამაზე საუბარი. 11 წელი გავიდა. ეს იყო უმძიმესი პერიოდი, განსაკუთრებით, ჩემი დის ცხოვრებაში, რომელიც შეეცადა ეს ყველაფერი დაევიწყებინა. ნინუცას უბრალოდ არ შეეძლო ამ ყველაფერზე ლაპარაკი. ის გადიოდა ურთულეს პროცესებს, მას შემდეგ რაც ის წამოვიდა მისი ოჯახიდან. ეს პროცესი მიდიოდა წლები. მას სჭირდებოდა ძალიან ბევრი ფსიქოლოგი, ფსიქიატრი და ა.შ.

დღეს, მგონი, სწორ დროს ამოიღო ხმა. ეს ყველაფერი არის ძალიან რთული ასე ადგე და ამ ყველაფერზე ილაპარაკო, როდესაც ასეთი უცნაური პროცესები მოჰყვება ამ ყველაფერს რაც მოჰყვა...

სწორია, უნდა ამხილო და არ აქვს მნიშვნელობა როდის, გუშინ, გუშინწინ, ბესო ზანგური იყო, არის და იქნება მუდამ მოძალადე", — თქვა რუსკა მაყაშვილმა გადაცემა კომენტარში.

მსახიობი და ტელეწამყვანი ნინუცა მაყაშვილი ყოფილ ქმარს, რუსთაველის თეატრის მსახიობს, ბესო ზანგურს ოჯახში ძალადობაში ადანაშაულებს. მაყაშვილმა განაცხადა, რომ ყოფილი ქმარი მასზე ფიზიკურად ძალადობდა ორსულობის დროსაც.

"არ მახსოვს რა იყო მიზეზი, მაგრამ მახსოვს, რომ ეს ყველაფრი გააკეთა თავისი ოჯახის წევრების წინ და მე ვიყავი ორსულად. ხელის აღებაც არ იყო. ანუ, რეალურად, ძალიან [მცემა]", — განაცხადა მან.

ბესო ზანგური ყოფილ ცოლზე ძალადობას უარყოფს და აცახდებს, რომ მზად არის გამოძიებას კითხვებზე პასუხები გასცეს.

"დაიწყონ გამოძიება, მოხარული ვიქნები რომ გამოძიებას გავცე პასუხები. [...] მანამდეც მყოლია ცოლი, ნინუცა მაყაშვილამდე და მის მერეც, ახლაც მყავს. არცერთი ასეთ რაღაცას არც იგონებს, არც ადასტურებს", — აცხადებს ის რუსთავი 2-თან.

მაყაშვილის განცხადებას რუსთაველის თეატრი გამოეხმაურა. მათი თქმით, გმობენ ყოველგვარ ძალადობას. კითხვაზე, აპირებენ თუ არა ბესო ზანგურთან თანამშრომლობის გაგრძელებას, თეატრში პასუხობენ, რომ ძალადობის დამტკიცებისა და იურიდიული დოკუმენტის გარეშე ამის განხილვის უფლება არ აქვთ.

"ამ ეტაპზე ჩვენ ვემიჯნებით და ვგმობთ ყველანაირ ძალადობას, მაგრამ ჩვენ არა ვართ იურიდიული დაწესებულება, რომ ეს გამოვიძიოთ. [...] თეატრს არ აქვს უფლება, იურიდიული დოკუმენტის გარეშე განიხილოს რამე", — განაცხადეს პრესსამსახურში.

ამავე თემაზე: