მსახიობი და ტელეწამყვანი ნინუცა მაყაშვილი ყოფილ ქმარს, რუსთაველის თეატრის მსახიობს, ბესო ზანგურს ოჯახში ძალადობაში ადანაშაულებს. რუსთავი 2-ის გადაცემა ფარულ კონვერტში მაყაშვილმა განაცხადა, რომ ყოფილი ქმარი მასზე ფიზიკურად ძალადობდა, მათ შორის, ორსულობის დროსაც.

"არ მახსოვს რა იყო მიზეზი, მაგრამ მახსოვს, რომ ეს ყველაფრი გააკეთა თავისი ოჯახის წევრების წინ და მე ვიყავი ორსულად. ხელის აღებაც არ იყო. ანუ, რეალურად, ძალიან [მცემა]", — განაცხადა მან.

მსხიობი ამბობს, რომ ყოფილი ქმარი ემუქრებოდა და შიშის გამო უწევდა მოთმენა. მისივე თქმით, ძალადობის მიზეზი სხვადასხვა უმნიშვნელო დეტალი ხდებოდა.

"ყოველთვის მეგონა, რომ ამაზე საუბრის სწორი მომენტი, სწორი დრო არ იყო. ახლა ამდენი დრო გავიდა, მე გავიზარდე და გადავლახე ეს ყველაფერი და ახლა უფრო მემარტივება ამაზე საუბარი", — განაცხადა მსახიობმა.

მანვე ისაუბრა, რატომ არის რთული ძალადობის მსხვერლისთვის თავის დაღწევა.

"ძალიან მარტივია ზოგადად, როცა ადამიანი ეგეთ რაღაცას გიყვება ჰკითხო — "რატომ არ გააკეთე, რატომ არ წამოხვედი პირველად რომ შეგეხო". მაგ დროს ვერ აზროვნებ, იმდენად ხარ ამ ყველაფერში, რომ არ ფიქრობ, ვერაფერზე ვეღარ ფიქრობ. ერთადერთი რისი ფიქრიც საშუალებაც მქონდა, რომ, ალბათ, ასე უნდა ვიყო, რომ სხვა არა დავაზიანო ამითი, ალბათ, ეს არის ჩემი ცხოვრება და ასე უნდა ვიყო. მაგ დროს შენს თავში ძალას ვერ პოულობ, იმიტომ, რომ მოწამლული ხარ და მოწამლული აზროვნება გაქვს".

On.ge დაუკავშირდა შინაგან საქმეთა სამინისტროს კითხვით, დაიწყო თუ არა გამოძიება. უწყების პასუხს მიღებისთანავე შემოგთავაზებთ. ვცდილობთ დაკავშირებას ბესო ზანგურთანაც, თუმცა მისი ტელეფონი მიუწვდომელია.