რუსთაველის თეატრის მსახიობი, ბესო ზანგური, რომელსაც ყოფილი ცოლი, მსახიობი და ტელეწამყვანი, ნინუცა მაყაშვილი ძალადობაში ადანაშაულებს, ამტკიცებს, რომ მოძალადე არ არის. ზანგურის თქმით, ეს მისთვის წითელი ხაზია.

"მე შეიძლება მძიმე ადამიანი ვარ, მაგრამ ჩემთვისაც არის წითელი ხაზი, რასაც არასოდეს არ გადავალ და ეს ძალადობაა, რასაც მუდამ ვგმობ. #არაძალადობას" — წერს მსახიობი ფეისბუქგვრდზე.

ამავე პოსტში ის დიდ დროს უთმობს რუსთაველის თეატრის რეჟისორზე, რობერტ სტურუაზე საუბარს. აღსანიშნავია, რომ სტურუა ძალადობაში ბრალდების შემდეგ ზანგურს გამოესარჩლა, რის გამოც კრიტიკის ობიექტი გახდა. მსახიობი სტურუას კრიტიკოსებს "ძალადობრივი ფსიქიკის მქონეებს" უწოდებს და ფიქრობს, რომ "ამხელა ადამიანის" ლანძღვა უნდა რცხვენოდეთ.

"ვინც ებრძვის რობერტ სტურუას და მის დემოკრატიულ იდეოლოგიას, ის არ არის და ვერასდროს გახდება ჩემთვის რუსთაველის თეატრის წევრი!!! ეს თქვენი სოლიდარობა და ფორმულას ლაკი ლუკი არის ერთი დიიიიდი უმსგავსობა!!! უკვე გასცდით მაყაშვილ ნინოს და საიდან რას სეტყვავთ წარმოდგენა არ გაქვთ!! [..].

ვერც იმას მიაღწევთ, რამე ვთქვა ნინო მაყაშვილზე, არაა ჩემი ინტერესის სფერო. ყველაფერს თავის საზღვრები აქვს, მაგრამ თქვენს ძალადობრივ ფსიქიკას არ აქვს საზღვარი. რა სიტყვებით და რა აზროვნებით ლანძღავთ ამხელა ადამიანს!!! როგორ არ გრცხვენიათ, როგორ არ გეცლებათ მიწა, მაგრამ გახსნილი გაქვთ და რაც გეხსნებათ, იმაზე ცალკე გასცემთ პასუხს!!!" — წერს ის ფეისბუქგვერდზე.

მსახიობი და ტელეწამყვანი ნინუცა მაყაშვილი ყოფილ ქმარს, რუსთაველის თეატრის მსახიობს, ბესო ზანგურს ოჯახში ძალადობაში ადანაშაულებს. მაყაშვილმა განაცხადა, რომ ყოფილი ქმარი მასზე ფიზიკურად ძალადობდა ორსულობის დროსაც.

"არ მახსოვს რა იყო მიზეზი, მაგრამ მახსოვს, რომ ეს ყველაფრი გააკეთა თავისი ოჯახის წევრების წინ და მე ვიყავი ორსულად. ხელის აღებაც არ იყო. ანუ, რეალურად, ძალიან [მცემა]", — განაცხადა მან.

ბესო ზანგური ყოფილ ცოლზე ძალადობას უარყოფს და აცახდებს, რომ მზად არის გამოძიებას კითხვებზე პასუხები გასცეს.

"დაიწყონ გამოძიება, მოხარული ვიქნები რომ გამოძიებას გავცე პასუხები. [...] მანამდეც მყოლია ცოლი, ნინუცა მაყაშვილამდე და მის მერეც, ახლაც მყავს. არცერთი ასეთ რაღაცას არც იგონებს, არც ადასტურებს", — აცხადებს ის რუსთავი 2-თან.

მაყაშვილის განცხადებას რუსთაველის თეატრი გამოეხმაურა. მათი თქმით, გმობენ ყოველგვარ ძალადობას. კითხვაზე, აპირებენ თუ არა ბესო ზანგურთან თანამშრომლობის გაგრძელებას, თეატრში პასუხობენ, რომ ძალადობის დამტკიცებისა და იურიდიული დოკუმენტის გარეშე ამის განხილვის უფლება არ აქვთ.

"ამ ეტაპზე ჩვენ ვემიჯნებით და ვგმობთ ყველანაირ ძალადობას, მაგრამ ჩვენ არა ვართ იურიდიული დაწესებულება, რომ ეს გამოვიძიოთ. [...] თეატრს არ აქვს უფლება, იურიდიული დოკუმენტის გარეშე განიხილოს რამე", — განაცხადეს პრესსამსახურში.

ამავე თემაზე:

• პროტესტის ნიშნად, აღარ ვაპირებ ბესო ზანგურთან ერთად სცენაზე დგომას — თამთა ინაშვილი
• "რეპრესიები!" — რობერტ სტურუა ბესო ზანგურზე ნინუცა მაყაშვილის განცხადებას ეხმაურება
• "რუსთაველის თეატრში ხელს აფარებენ მოძალადეებს" — დათა თავაძე ნინუცა მაყაშვილს სოლიდარობას უცხადებს