Paramount+-ისა და Amazon-ის პლატფორმებიდან SpongeBob SquarePants-ის მეთორმეტე სეზონის ერთ-ერთი სერია, სახელად Kwarantined Crab წაიშალა. ამის მიზეზი კი ეპიზოდის შინაარსი გახდა. აღნიშნულ სერიაში კრასტი კრაბის რესტორანში ვირუსს აღმოაჩენენ, რის გამოც პერსონაჟები კარანტინში ხვდებიან. სერიალის გმირები შფოთვას იწყებენ, ის პერსონაჟები კი, რომელთაც ვირუსი აღმოაჩნდებათ, საზოგადოებისგან გარიყვის შემდეგ, საყინულეში ხვდებიან.

ეპიზოდის წაშლის მიზეზი თემის სენსიტიურობა გახდა.

"გადავწყვიტეთ, რომ აღნიშნული ეპიზოდი რეალურ სამყაროში გლობალურ პანდემიასთან დაკავშირებული სენსიტიურობის გათვალისწინებით არ გავუშვათ", — განუცხადა Nickelodeon-ის წარმომადგენელმა CNN-ს.

CNN აღნიშნული ეპიზოდის წაშლას, აგრეთვე, ამერიკის შეერთებულ შტატებში აზიური წარმოშობის ადამიანების მიმართ გახშირებულ სიძულვილს უკავშირებს. Kwarantined Crab-ში იზოლაციაში მოქცეული პერსონაჟები სიძულვილის ადრესატები ხდებიან. CNN-ის მიხედვით, ეს გრძნობა კორონავირუსის გავრცელების შემდეგ ამერიკაში მცხოვრები აზიელებისთვის ნაცნობია, განსაკუთრებით იმის გათვალისწინებით, რომ კორონავირუსს უამრავი ადამიანი "ჩინურ ვირუსს" უწოდებს.

სტრიმინგ პლატფორმებიდან სპანჯბობის კიდევ ერთი ეპიზოდი, სახელად Mid-Life Crustacean-იც წაშალეს. აღნიშნულ ეპიზოდში სპანჯბობი, პატრიკი და მისტერ კრაბსი ქალის სახლში იპარებიან და მის საცვალს იპარავენ, რის გამოც Nickelodeon-მა სერია მიუღებლად მიიჩნია.