თურქეთის ელჩი საქართველოში, ფატმა ჯერენ იაზგანი ნამახვანჰესის ირგვლივ განვითარებულ მოვლენებზე ამბობს, ინვესტორი ისრაელიდან, იტალიიდან ან ამერიკიდან რომ ყოფილიყო, ვინმე აღმართავდა ადგილზე ჯვარს თუ არა.

"მაგალითად, ეს რომ ყოფილიყო კომპანია ისრაელიდან, იტალიიდან, ამერიკიდან, ვინმე აღმართავდა ჯვარს? არ ვიცი. ამიტომაც, მინდა ვკითხო ადამიანებს, რატომ შემოგაქვთ რელიგიური სიმბოლო? ვფიქრობ, ეს ძალიან სენსიტიურია", — თქვა თურქეთის ელჩმა გადაცემა კონტექსტში ფორმულას თარგმანის მიხედვით.

მისივე თქმით, ის კორუმპირებულ კომპანიას არ დაიცავს, მაგრამ იქვე აღნიშნავს, რომ ენკა კორუმპირებული არ არის.

"ვინც ამ ბრალდებას აჟღერებს, უნდა დაამტკიცოს", — განაცხადა ფატმა ჯერენ იაზგანი.

ელჩმა, ასევე, აღნიშნა ხელშეკრულების დადებიდან თითქმის ერთი წლის შემდეგ დაწყებული პროტესტის ხილვა მისთვის მოულოდნელი იყო.

"მეორე, რამაც გამაკვირვა იყო ანტითურქული ტონი, თურქოფობია და რაღაც შემთხვევაში, ისლამოფობიური პროპაგანდა, ეს ძალიან შემაშფოთებელია, რადგან მე პატივს ვცემ ქართულ კულტურას, მართლმადიდებლური სარწმუნოება ქართული იდენტობის განუყიფელი ნაწილია, მაგრამ, როდესაც ჯვარი აღიმართება სამშენებლო უბანზე და ჩვენ ვამბობთ, რომ არ გვინდა თურქული კომპანია საქართველოში, მე ეჭვები მიჩნდება, რომ ეს არ არის ის საქართველო, რომელსაც ვიცნობ", — აღნიშნა იაზგანმა.

რიონის ხეობაში ნამახვანჰესის მშენებლობას ეწინააღმდეგებიან როგორც ადგილობრივები, ისე არასამთავრობო ორგანიზაციები.

ნამახვანჰესის კასკადი მდინარე რიონზე უნდა აშენდეს და ორ ჰესს მოიცავს, ქვემო და ზემო ნამახვანჰესს. ორივე ჰესი ერთად 433 მგვტ სიმძლავრის იქნება. პროექტი 750 მილიონი აშშ დოლარის ღირებულებისაა და იგეგმება, რომ კასკადი ექსპლუატაციაში 2025-2026 წელს შევიდეს. პროექტს კომპანია ენკა რინიუებლზ ახორციელებს.

ადგილობრივი მოსახლეობა სოფელ ჟონეთში ოთხი თვეა ჰესის მშენებლობას აპროტესტებს. ისინი ხეობიდან კომპანიის გასვლასა და მშენებლობის შეჩერებას მოითხოვენ. ამავე დროს, ქართულ ოცნებაში მიაჩნიათ, რომ ადგილობრივი მოსახლეობისთვის არაა ნაჩვენები ნამახვანჰესის სიკეთეები და მეტი კომუნიკაციაა საჭირო.