საქართველოს ექსპრეზიდენტი, მიხეილ სააკაშვილი აცხადებს, რომ "სააკაშვილი უნდა გაიწიოს" ნარატივში ლოგია არაა.

"ძვირფასო TV პირველის ჟურნალისტებო #ინგაგრიგოლია, #ეკამიშველაძე როდესაც იმეორებთ, რომ სააკაშვილი და ივანიშვილი, ორივე უნდა გაიწიოს, ინგა გრიგოლია თავისი სახელით ამბობს ამას და ეკა მიშველაძე მუდმივად ციტირებს, ვიღაც მითიურ დასავლელ პოლიტიკოსებს, ამაზე ჩემი პასუხი არის შემდეგი: გყავთ მოქმედი ოლიგარქი ივანიშვილი, რომელიც ყოველდღიურად ანგრევს ქვეყანას, ყოველდღიურად ძარცვავს თითოეულ ქართველს, დემოგრაფიული და ეკოლოგიური კატასტროფა მოაწყო საქართველოში და სააკაშვილი და ივანიშვილი ერთნაირად უნდა გაიწიონო... სააკაშვილი საიდან უნდა გაიწიოს — ლოგიკა არსებობს?! თუ იმაზე საუბრობთ, რომ მე ჩემს ქვეყანაში არ უნდა ჩამოვიდე სიკვდილამდე? მაგას ვერ ეღირსება ვერავინ — საქართველო არის ჩემი სამშობლო", — წერს სააკაშვილი.

შეგახსენებთ, კუბილიუსმა განაცხადა, რომ ქართულ ოცნებასა და ოპოზიციას შორის მოლაპარაკებები უფრო ეფექტიანი იქნება, თუ პროცესში "არაფორმალური ლიდერები" — მიხეილ სააკაშვილი და ბიძინა ივანიშვილი ჩაერთვებიან.

ანდრიუს კუბილიუსი ქართულ ოცნებასა და ოპოზიციას შორის მოლაპარაკების პროცესში არაფორმალური ლიდერების ჩართვის ინიციატივით 25 მარტს გამოვიდა. მისი თქმით, ფორმალურ ლიდერებს, რომლებსაც მონაწილეობენ მოლაპარაკებებში "არ ესმით თავიანთი პასუხისმგებლობა, ვერ პოულობენ კომპრომისს". სწორედ ამიტომ ჩათვალა საჭიროდ ევროპარლამენტარმა, მოლაპარაკებებში ჩართულიყვნენ ადამიანები, რომლებიც ფორმალურად არა, მაგრამ "პოლიტიკური და ფსიქოლოგიური თვალსაზრისით კვლავ ლიდერები არიან".

ამ განცხადებას კონტროვერსული რეაქციები მოჰყვა როგორც დასავლეთში, ისევე საქართველოში. ზოგიერთი პოლიტიკური ძალა ფიქრობდა, რომ სააკაშვილი, ისევე როგორც ბიძინა ივანიშვილი, მოლაპარაკებების პროცესიდან უნდა "გაწეულიყო".