ჯანდაცვის მინისტრის მოადგილის, თამარ გაბუნიას განცხადებით, ჯერ კიდევ საკმარისი დრო აქვთ, რომ ანტივაქსერები ვაქცინის ეფექტურობაში დაარწმუნონ. ამის შესახებ მან საკოორდინაციო საბჭოს წევრების ბრიფინგზე ისაუბრა.

"საინფორმაციო კამპანია არის ერთ-ერთი სტრატეგია. მე გეთანხმებით, საინფორმაციო კამპანიის აუცილებლობა აშკარად იკვეთება. ის, რომ ნახევარი მოსახლეობის უნდობლობას უცხადებს ვაქცინას, ესეც გასაკვირი არ არის და სწორედ ამიტომ არის აქტიური საინფორმაციო კამპანია საჭირო.

მისი დაწყება ასეც იყო დაგეგმილი ვაქცინაციის გეგმით, რადგან ზოგადად, მოსახლეობის მოცვა გეგმის თანახმად არის მეორე კვარტლის ბოლო, მესამე და მეოთხე კვარტალი. ამიტომ, ჩვენ ჯერ კიდევ საკმარისი დრო გვაქვს იმისთვის, რომ ანტივაქსერები და უნდობლობად განწყობილი პირები დარწმუნდნენ ვაქცინის ეფექტურობაში", — თქვა მან.

კაპმანიის აუცილებლობაზე ისაუბრა დაავადებათა კონტროლის ეროვნული ცენტრის დირექტორმა, ამირან გამყრელიძემაც. მისი თქმით, ეს იანვრიდან "ნაბიჯ-ნაბიჯ" დაიწყო და იმედს გამოთქვამს, რომ უფრო გაძლიერდება.

"Covid-19-ის საწინააღმდეგო ვაქცინაციაზე საკომუნიკაციო კამპანიას აქვს ძალიან დიდი მნიშვნელობა. ის ნაბიჯ-ნაბიჯ დაიწყო იანვრიდან. გასაგებია ის, რომ ძალიან აგრესიული არ იყო, რადგან გარანტირებული ვაქცინების მოწოდება არ იყო, მიუხედავად იმისა, რომ კოვაქსთან ახლო ურთიერთობა გვქონდა, რამდენჯერმე გადაიდო მოწოდების თარიღები. გუშინაც დღესაც საკოორდინაციო საბჭოს წარვუდგინეთ დაავადებათ კონტროლის ცენტრის ხედვა ამ საკითხთან მიმართებაში. იმედია, რომ ის გაზიარებული იქნება და შეასაბამისად ეს კამპანია კიდევ უფრო გაძლიერდება", — განაცხადა გამყრელიძემ.

დღეს, 23 მარტს NDI-იმ ახალი კვლევის შედეგები გამოაქვეყნა. ამის თანახმად, გამოკითხულთა 53 პროცენტი კორონავირუსის წინააღმდეგ ვაქცინის გაკეთებას არ აპირებს. ამასთან, აცრის გაკეთებაზე თანახმაა მხოლოდ 35 პროცენტი, ხოლო 12-მა პროცენტმა არ იცის.