ქართული ოცნების პოლიტიკური საბჭოს წევრი, თეა წულუკიანის ამბობს რომ ყოფილი პრემიერმინისტრის, გიორგი გახარიას პოლიტიკიდან წასვლა ძალიან გაუკვირდა, თუმცა ამატებს, რომ კიდევ უფრო გაუკვირდა მისი დაბრუნება.

"ძალიან გამიკვირდა მისი წასვლა, ახლა კიდევ უფრო გამიკვირდა მისი მოსვლა. მე არ მინდა იქამდე მივიდე, ვთქვა ან წასვლა რა იყო, ან მოსვლა რა იყო-მეთქი, მაგრამ, გამიკვირდა, ამას ვიტყვი", — განაცხადა წულუკიანმა იმედის ეთერში.

გარდა იმისა, რომ გაუკვირდა, წულუკიანი ამბობს იმასაც, რომ იმედი ჰქონდა გახარია პოლიტიკაში აღარ დაბრუნდებოდა.

"ბევრი ამბობდა, მათ შორის, მედიასივრცეში სულ ამაზე იყო საუბარი, რომ ის დაბრუნდება, ის ჩაუდგება ქართულ ოცნებას ოპოზიციაში და ა.შ. რაკი ჩემს აზრს მეკითხებით, მე გეტყვით, რომ იმედი მქონდა, რომ ის ამას არ გააკეთებდა", — ამბობს წულუკიანი.

მისი თქმით, გახარია თუ პოლიტიკაში დაბრუნდება, ის, თავისთავად, იქნება ქართული ოცნების ოპოზიცია. თუმცა, წულუკიანი ფიქრობს, რომ ეს ვერ დააზიანებს მმართველ გუნდს.

"ის თუ შემობრუნდა და როგორც ჩანს, მას ეს გადაწყვეტილი აქვს, რა თქმა უნდა, ის იქნება ჩვენი ოპოზიცია და შესაბამისად, ჩვენ მოგვიწევს ოპონირება. ეს საინტერესო იქნება. მე ვერ ვიტყვი, რომ ქართული ოცნებისთვის ეს საზიანო იქნება — ჩვენთვის საზიანო მისი წასვლა იყო, მისი მოსვლა ჩვენთვის საზიანო არ მგონია", — აცხადებს წულუკიანი.

იგი ამბობს იმასაც, რომ გახარიას მოუწევს კითხვებზე პასუხის გაცემა და ვარაუდობს, რომ ეს კითხვები მისთვის კომფორტული არ იქნება.

"მე მგონია, რომ ჯობდა არ წასულიყო. რაკი ეს მოხდა, ეს შემობრუნებაც ჩემთვის კითხვის ნიშნებს ბადებს [...] იქნება კითხვები, რასაც პასუხები უნდა გაეცეს და ეს რამდენად კომფორტული კითხვები იქნება, მე არ ვარ დარწმუნებული. თუმცა, წარმატებას ვუსურვებ", — განაცხადა თეა წულუკიანმა.

ის, რომ გახარიას კითხვებზე აქვს პასუხი გასაცემი, ამბობს ევროპული საქართველოს ერთ-ერთი ლიდერი, სერგი კაპანაძეც. მისი შეფასებით, თუ გიორგი გახარიას უნდა პოლიტიკაში დარჩენა, პასუხი უნდა გასცეს მისი მისამართით დასმულ კითხვებს.

დღეს, გიორგი გახარიამ განაცხადა, რომ პოლიტიკიდან წასვლას არ აპირებს.

"გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — უთხრა ჟურნალისტებს გახარიამ.

გახარიამ პრემიერმინისტრის თანამდებობა 18 თებერვალს დატოვა და ამის მიზეზად ნაციონალური მოძრაბის თავმჯდომარის, ნიკა მელიას საქმეზე ქართული ოცნების გუნდში აზრთა სხვადასხვაობა დაასახელა.

გაიგეთ მეტი: