ქართული ოცნების დეუტატის, ბექა დავითულიანის განცხადებით, ყოფილი პრემიერმინისტრი, გიორგი გახარია თუ იმავე წარმატებით განაგრძობს ოპოზიციაში ყოფნას, ეს ქართული პოლიტიკისთვის მხოლოდ "კარგი" იქნება.

"გახარია იყო კარგი პრემიერმინისტრი ჩემი შეფასებით, მას ბევრი მნიშვნელოვანი საქმე აქვს გაკეთებული და თუ იმავე წარმატებით განაგრძნობს ის ოპოზიციის როლში მოღვაწეობას, ეს იქნება მხოლოდ კარგი ქართული პოლიტიკისთვის.

ძალიან ბევრი ქართულ ოცნებაში მეგობრობს, ადამიანური ურთიერთობები აქვთ გიორგი გახარიასთან, ამიტომ მასთან ერთად თუ დავინახეთ, ეს იმას არ ნიშნავს, რომ არშექმნილი პოლიტიკური გუნდის წევრია", — თქვა მან.

პრემიერმინისტრობიდან გადადგომის შემდეგ გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს.

"რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — განაცხადა გახარიამ.

18 თებერვალს, ნიკა მელიასთვის პატიმრობის შეფარდებიდან რამდენიმე საათში, საქართველოს პრემიერმინისტრი, გიორგი გახარია გადადგა. მან გადადგომის მიზეზად სწორედ ამ საქმესთან დაკავშირებით გუნდში არსებული აზრთა სხვადასხვაობა დაასახელა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გახარიას გადადგომამდე ხმები მანამდეც ვრცელდებოდა, თუმცა გადადგომამდე 6 დღით ადრე მან განაცხადა, რომ არსად მიდის და ჯერჯერობით "მოდის".