ქართული ოცნების დეპუტატის, გია ვოლსკის განცხადებით, ყოფილ პრემიერმინისტრს, გიორგი გახარიას "მეტი პრინციპულობა" უნდა გამოეჩინა იმ გადაწყვეტილებებზე, რომლებსაც "სახელმწიფოებრივი მნიშვნელობა" ჰქონდა.

"არ მიმაჩნია, რომ მისი პოლიტიკური შეხედულება იმ საკითხებთან დაკავშირებით, რაც ბოლოს მოხდა, იყო მართებული და სიღრმისეულად გააზრებული. მიუხედავად ამისა, ვადასტურებ, რომ არაერთხელ ერთნაირი პოზიციით გამოვსულვართ კიდევაც მე და პიროვნულად ორი კაცი არა მაქვს მხედველობაში. ის იყო ერთ-ერთი გამორჩეული ლიდერი პარტიის. მე ვფიქრობ, რომ გადაწყვეტილებებს, რომლებსაც სახელმწიფოებრივი მნიშვნელობა ჰქონდა, აქ გაცილებით მეტი პრინციპულობა უნდა გამოეჩინა", — თქვა მან.

პრემიერმინისტრობიდან გადადგომის შემდეგ გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს.

"რეალურად, გეგმებს მივყვებით, ჩვენს დღის წესრიგს, რაც მოგვცემს იმის შესაძლებლობას და საშუალებას, რომ უახლოეს პერიოდში ყველაფერი დეტალურად გაგიზიაროთ და მოგიყვეთ", — განაცხადა გახარიამ.

18 თებერვალს, ნიკა მელიასთვის პატიმრობის შეფარდებიდან რამდენიმე საათში, საქართველოს პრემიერმინისტრი, გიორგი გახარია გადადგა. მან გადადგომის მიზეზად სწორედ ამ საქმესთან დაკავშირებით გუნდში არსებული აზრთა სხვადასხვაობა დაასახელა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გახარიას გადადგომამდე ხმები მანამდეც ვრცელდებოდა, თუმცა გადადგომამდე 6 დღით ადრე მან განაცხადა, რომ არსად მიდის და ჯერჯერობით "მოდის".