პარლამენტის თავმჯდომარის, არჩილ თალაკვაძის თქმით, ნაციონალური მოძრაობის თავმჯდომარეს, ნიკა მელიას შეეძლო გირაოს სანაცვლოდ გამოსულიყო პატიმრობიდან და მონაწილეობა მიეღო მმართველ პარტიასა და ოპოზიციას შორის მიმდინარე მოლაპარაკების პროცესში.

"გვესმოდა, რომ მათი [ოპოზიციური პარტიების] წარმომადგენლები ამბობდნენ, რომ ნიკა მელიას გარეშე მოლაპარაკებები არ უნდა ჩატარებულიყოო. გადაეხადათ გირაო და მოსულიყო მოლაპარაკებებზე", — განაცხადა თალაკვაძემ საზოგადოებრივი მაუწყებლის ეთერში.

თალაკვაძის ლოგიკით, ოპოზიცია არათანმიმდევრულია, როცა ერთი მხრივ, ითხოვს მართლმსაჯულებისა და პოლიტიკის გამიჯვნას, მეორე მხრივ კი ქართულ ოცნებას სთხოვს ე.წ. პოლიტპატიმრების გათავისუფლებას.

"ერთი მხრივ, ჩვენ გვაკრიტიკებს ოპოზიცია და გვთხოვს ამ მოლაპარაკებებში, რომ მართლმსაჯულება იყოს პოლიტიკისგან სრულად გამიჯნული, ანუ, პოლიტიკა არ უნდა ჩაერიოს მართლმსაჯულებაში — ხომ იცით, რომ ეს არის ერთ-ერთი მთავარი მოთხოვნა მათი?! ამავე მოლაპარაკებებში, იგივე დროს და იგივე ხალხი გვთხოვს ასევე, რომ ქართულმა ოცნებამ პოლიტიკური დავალება მისცეს პროკურატურას და სასამართლოს, კონკრეტულ, ერთ თუ მერე პატიმართან დაკავშირებით. მითხარით, როგორ არის ეს საკითხები ერთმანეთთან შესაბამისობაში?", — ამბობს თალაკვაძე.

18 მარტს, ევროკავშირის წარმომადგენლის, კრისტიან დანიელსონის მედიაციით, ქართულ ოცნებასა და ოპოზიციას შორის ბოლო მოლაპარაკება გაიმართა. 10-საათიანი შეხვედრის შემდეგ დანიელსონმა განაცხადა, რომ საბოლოო შეთანხმება ვერ მოხერხდა და მედიატორმა დღეს ბრიუსელში გაემგზავრა.

მოლაპარაკებებზე ერთ-ერთი მთავარი განსახილველი საკითხი ე.წ. პოლიტპატიმრების, ნიკა მელიასა და გიორგი რურუას გათავისუფლებაა.

მელია თითქმის ერთი თვის წინ, 23 თებერვალს, საკუთარი კაბინეტში, სპეცრაზმის დახმარებით დააკავეს. სამართალდამცავები პარტიის ოფისში გამთენიისას გამოჩნდნენ — რამდენიმე საათში მას შემდეგ, რაც ირაკლი ღარიბაშვილი პრემიერმინისტრად აირჩიეს.

გაიგეთ მეტი: