ნაციონალური მოძრაობის თავმჯდომარის, ნიკა მელიას განცხადებით, ის, რაც ევროპული საბჭოს პრეზიდენტმა შარლ მიშელმა მედიაციის დაიწყო, პოლიტიკური ჩიხიდან თავის დაღწევის დიდი შანსია. ამის შესახებ მან საკუთარ ფეუისბუქზე დაწერა და აღნიშნა, რომ ეს მხარდაჭერა მას ციხეში ძალას მატებს.

"[ეს] უდიდესი შანსია, რომ პოლიტიკურ ჩიხს თავი დავაღწიოთ და ქვეყნის მომავლისთვის შესაძლებლობების ახალი ფანჯარა გავხსნათ. ამისთვის საჭიროა, ამ მხარდაჭერას ბოლომდე ჩავეჭიდოთ, სწორად გამოვიყენოთ ის ძალისხმევა, რომელსაც ჩვენი მეგობრები საქართველოს სახელმწიფოს გადასარჩენად იჩენენ და ეს კეთილგანწობა არ გავფლანგოთ; ამისთვის საჭიროა, ოლიგარქის ხელისუფლებამ უპირობოდ გადადგას ის ნაბიჯები, რომლისკენაც მას ჩვენი დასავლელი პარტნიორები მოუწოდებენ. ჩვენ რეალური საარჩევნო რეფორმა უნდა განვახორციელოთ და მართლმსაჯულების სისტემის პოლიტიკური გავლენისგან გასათავისუფლებლად რეალური მექანიზმები შევიმუშავოთ.

ეს უნიკიალური შანსი უნდა გამოვიყენოთ და ის რეფორმები გავატაროთ, რომლებიც სახელმწიფოს შტოებს ერთმანეთისგან დამოუკიდებელს გახდის, რაც მოგვცემს იმის გარანტიას, რომ, ვინც არ უნდა მოვიდეს ხელისუფლებაში, ოპოზიციას პოლიტიკურ პროცესებზე გავლენის მოსახდენად ბერკეტები ყოველთვის ექნება და დამოუკიდებელი ინსტიტუტები ვეღარ მოექცევიან ხელისუფლების პოლიტიკური ძალის გავლენის ქვეშ.
და რაც ყველაზე მთავარია, ამ რეფორმების პარალელურად, სასიცოცხლოდ აუცილებელია ვადამდელი არჩევნების დანიშვნა", — თქვა მან.

15 მარტს, ევროკავშრის წარმომადგენელთან, კრისტიან დანიელსონთან შეხვედრის შემდეგ, ირაკლი კობახიძემ განაცხადა, რომ პრემიერმინისტრი ირაკლი ღარიბაშილი ბრიუსელში "ძალიან მსხვილი პაკეტით მიდის", ხოლო ოპოზიციას "აქვთ ცარიელი ხელები, დარჩენილი არიან ქუჩაში".

კრისტიან დანიელსონი არის შვედი დიპლომატი, რომელიც ევროპული საბჭოს პრეზიდენტის, შარლ მიშელის პირადი წარმომადგენელია ქართულ ოცნებასა და ოპოზიციას შორის მოლაპარაკებების პროცესში. იგი საქართველოში მას შემდეგ ჩამოვიდა, რაც მიშელმა მხარეებს 6-პუნქტიანი გეგმა წარუდგინა და შესთავაზა მოლაპარაკებების გაგრძელება ამ პუნქტების ირგვლივ 15 მარტამდე, ანუ ირაკლი ღარიბაშვილის ბრიუსელში გამგზავრებამდე.

დანიელსონი უკვე მეოთხე დღეა მართავს შეხვედრებს როგორც მმართველი პარტიის, ისე ოპოზიციის ლიდერებთან. იგი, ასევე, შეხვდა პრეზიდენტს და არასამთავრობო ორგანიზაციების წარმომადგენლებს.

14 მარტი იყო დანიელსონის ვიზიტის ბოლო დღე საქართველოში, თუმცა, გუშინ, პარტიებთან შეხვედრების შემდეგ, მან განაცხადა, რომ გამგზავრება ერთი დღით გადადო. მისი თქმით, იმედოვნებდა, რომ მხარეები მიაღწევდნენ შეთანხმებას, თუმცა რადგან ეს ჯერჯერობით ვერ მოხერხდა, რჩება საქართველოში.

დღეს დილით იგი კიდევ ერთხელ შეხვდა ოპოზიციური პარტიების ლიდერებს. შეხვედრის შემდეგ მათ განაცხადეს, რომ დანიელსონი საქართველოში დარჩება იქამდე, სანამ შეთანხმებას არ მიაღწევენ.

გაიგეთ მეტი:

• დანიელსონი ამბობს, რომ თავად დებს წინადადებებს, ის არ არის შუამავალი — ჯაფარიძე
• დავეთანხმები "ოცნებას", სავსე ხელებით წავიდა ბრიუსელში ღარიბაშვილი, ოღონდ პრობლემებით სავსე ხელებით — ჯაფარიძე
• მიშელმა საკუთარი რეპუტაცია დააყენა სასწორზე, ვინაიდან ითავა აქ წარმატების მიღწევა — პაპუაშვილი მოლაპარაკებებზე
• კონკრეტული ამოცანა მაქვს მიშელისგან დაკისრებული, რომ მხარეებს მედიაციის პროცესში დავეხმარო — დანიელსონი