პარტია გირჩი — მეტი თავისუფლების ლიდერი, ზურაბ ჯაფარიძე ამბობს, რომ ევროკავშირის წარმომადგენელი, კრისტიან დენიელსონი, რომელიც მმართველ პარტიასა და ოპოზიციას შორის მოლაპარაკებების მედიატორია, თავად სთავაზოს მხარეებს წინადადებებს.

"ეს ფორმატი თვითონ ისეთი არის, რომ ჩენ არ გვაქვს ინფორმაცია ქართული ოცნების შეთავაზებები რა არის. ჩვენ რაზეც ვსაუბრობთ, ეს არის შარლ მიშელის მიერ დატოვებული 6 პუნქტი [...] ჩვენ რაც გვხვდება იქ ბატონ დანიელსონთან შეხვედრაზე, ეს არის, მისივე განცხადებით, ეს არის მისი წინადადებები. ანუ, ის არ არის შუამავალი, რომელსაც დააქვს აქედან იქით წინადადებები. ის თვითონ დებს გარკვეულ წინადადებებს და ამ წინადადებებთან მიმართებაში აინტერესებს ჩვენი აზრი", — განაცხადა ზურაბ ჯაფარიძემ.

ჯაფარიძე ამბობს, რომ ოპოზიცია დანიელსონთან შეხვედრაზე არ განიხილავს ქართული ოცნების პოზიციებს აღნიშნულ 6 პუნქტზე. მისი თქმით, ოპოზიცია მმართველი პარტიის ლიდერების პოზიციებს მხოლოდ მათი საჯარო განცხადებებიდან ეცნობა.

კრისტიან დანიელსონი არის შვედი დიპლომატი, რომელიც ევროპული საბჭოს პრეზიდენტის, შარლ მიშელის პირადი წარმომადგენელია ქართულ ოცნებასა და ოპოზიციას შორის მოლაპარაკებების პროცესში.

დანიელსონი საქართველოში 12 მარტს ჩამოვიდა და უკვე მეოთხე დღეა მართავს შეხვედრებს როგორც მმართველი პარტიის, ისე ოპოზიციის ლიდერებთან. იგი, ასევე, შეხვდა პრეზიდენტ და არასამთავრობო ორგანიზაციების წარმომადგენლებს.

14 მარტი იყო დანიელსონის ვიზიტის ბოლო დღე საქართველოში, თუმცა, გუშინ, პარტიებთან შეხვედრების შემდეგ მან განაცხადა, რომ გამგზავრება ერთი დღით გადადო. მისი თქმით, იმედოვნებდა, რომ მხარეები მიაღწევდნენ შეთანხმებას, თუმცა რადგან ეს ჯერჯერობით ვერ მოხერხდა, რჩება საქართველოში.

დღეს დილით იგი კიდევ ერთხელ შეხვდა ოპოზიციური პარტიების ლიდერებს. შეხვედრის შემდეგ მათ განაცხადეს, რომ დანიელსონი საქართველოში დარჩება იქამდე, სანამ შეთანხმებას არ მიაღწევენ.

გაიგეთ მეტი: