ქართული ოცნების თავმჯდომარე, ირაკლი კობახიძე ამტკიცებს, რომ TV პირველი "ნაცმოძრაობაა" და ყოფილი პრეზიდენტის, მიხეილ სააკაშვილისგან სუბსიდირდება. ამის შესახებ მან რუსთავი 2-ის ეთერში ისაუბრა.

"TV პირველი არის ნაცმოძრაობა, ხომ? ყველამ კარგად ვიცით, TV პირველი ეს არის ნაციონალური მოძრაობის პარტიული ერთ-ერთი ტელევიზია, ისევე, როგორც მთავარი. ყველაფრით [შეგვიძლია ეს დავადასტუროთ], მათ შორის, დაფინანსებით. ნაციონალური მოძრაობა აფინანსებს, ახდენს ამ ტელევიზიის სუბსიდირებას. მოგებაზე ვერ მუშაობს ეს ტელევიზია, ხდება მისი სუბსიდირება.

მიხეილ სააკაშვილი თქვენ რა გგონიათ, როგორ მართავს მთლიანად ვითარებას ოპოზიციაში? რატომ არის ის, ასე ვთქვათ, ყველაზე გავლენიანი პირი ოპოზიციაში? მას აქვს ორი რესურსი, ეს არის ფული, მილიონები, რომელიც ქართველ ხალხს მოპარა და ეს არის მედია რესურსი, რომელიც, მათ შორის, ამ მოპარული ფულით ფუნქციონირებს", — თქვა მან.

კობახიძის აზრით, TV პირველის მხირდან სასამართლოს განჩინების შემდეგ, "ღიმილისმომგვრელი კამპანია" ვიხილეთ.

"მკაფიოდ გაკეთდა განცხადება თავიდანვე, რომ არავითარ შემთხვევაში, ამ იძულების პროპორციულ ზომაში, თან პროპორციული სიტყვაა მანდ მნიშვნელოვანი, საუბარია იმაზე, რომ სამართლებრივი პრინციპების დაცვით მოქმედებს ყველა შემთხვეაში სამართალდამცავი ორგანო, როდესაც რეაგირებს გარკვეულ ფაქტზე. კამპანია აწიეს ტელევიზიაში შეჭრაზე, ჟურნალისტების მიმართ ძალადობაზე და ასე შემდეგ", — თქვა მან.

11 მარტს TV პირველმა მიიღო სასამართლოს განკარგულება, რომლითაც დაკმაყოფილდა პროკურატურის მოთხოვნა ტელეკომპანიიდან ბერა ივანიშვილისა და ირაკლი ღარიბაშვილის საუბრის ჩანაწერების ამოღების შესახებ. თუმცა განკარგულებაში წერია ისიც, რომ თუ TV პირველი არ მიაწოდებს ჩანაწერების შესახებ ინფორმაციას საგამოძიებო მოქმედებების ჩამტარებელ პირს ან ორგანოს, მათ უფლება აქვთ წინააღმდეგობის გაწევისას გამოიყენოს იძულების პროპორციული ზომა.

TV პირველმა 6 მარტს გაავრცელა ჩანაწერები, სადაც, ირაკლი ღარიბაშვილი, ბერა ივანიშვილი და ანზორ ჩუბინიძე, სავარაუდოდ, იმ ადამიანების დასჯას გეგმავენ და განიხილავენ, ვინც ბერა ივანიშვილს აგინებს. ჩანაწერში საუბარია უკვე მომხდარ ფაქტებზეც, რომელთა მოყოლის პროცესში ირაკლი ღარიბაშვილი და ბერა ივანიშვილი იციანიან. ქართული ოცნების დამფუძნებლის შვილი კმაყოფილებას გამოხატავს იმის გამო, რომ მისი გინებისთვის ადამიანები ისჯებიან.

პროკურატურამ აღნიშნულ საქმეზე გამოძიება კერძო საუბრის უკანონო მიყურადების, ჩაწერისა და გავრცელების მუხლით დაიწყო.

უწყება არაფერს ამბობს იმაზე, დაინტერესდა თუ არა სავარაუდო ძალადობის ფაქტებით, რაზეც ჩანაწერშია საუბარი.

პროკურატურის ინფორმაციით, საქმეზე მიმდინარე გამოძიების ფარგლებში, ჩატარდება ყველა საჭირო საგამოძიებო და საპროცესო მოქმედება ჩანაწერის მოპოვების და გავრცელების კანონიერების დასადგენად.

სამი დღის შემდეგ, 9 მარტს, ბერა ივანიშვილმა განაცხადა, რომ 2011 წელს მისი ფანების მშობლებმა ბულინგის შესახებ აცნობეს და დაცვის სამსახურმა "ყველა კანონის, მორალის დაცვით მოინახულა" ისინი. ბერა ივანიშვილმა, ასევე, განაცხადა, რომ თუ ვინმე დედას შეაგინებს, აუცილებლად მოსთხოვს პასუხს დღესაც.

გაიგეთ მეტი: