გასულ წელს არაერთხელ დავრწმუნდით, რომ პოლიტკორექტულობის პრიზმაში გატარებისას ბევრი კლასიკური ნაწარმოები — იქნება ეს წიგნი, ფილმი თუ ხელოვნების სხვა ნიმუში — კრიტიკას ვერ უძლებს. ამის გამო სტრიმინგ პლატფორმები ცდილობენ, რასისტული თუ სხვაგვარად შეურაცხმყოფელი კონტენტის შემცველი ფილმები ან საერთოდ წაშალონ, ან გაფრთხილება დაურთონ დასაწყისში.

სწორედ ამის გამო, ამერიკულმა ტელეარხმა Turner Classic Movies-მა (WarnerMedia-ს საკუთრებაში მყოფი კომპანია), ფილმების ჩვენების ყოველკვირეული სერია დაიწყო. სერიას გადაფასება: კლასიკური ფილმები რეტროსპექტივაში ერქმევა. არხის ხუთი ტელეწამყვანი ფილმებს შესავლად თანამედროვე კონტექსტში განხილვას წაუმძღვარებს.

ფილმებს შორისაა ქარწაღებულნი, ოთხი ბუმბული, შვიდი ახალდაქორწინებული და შვიდი ძმა, ჯაზის მომღერალი, მეზღვაური სინბადი, ტარზანი, საუზმე ტიფანისთან, ჰიჩკოკის თოკი და სხვა ათობით კინოსურათი.

"ეს ყველა ფილმი ლეგენდარული კლასიკაა, თუმცა, როცა მათ დღეს ვუყურებთ, განსხვავებულ კულტურულ კონტექსტში აღვიქვამთ. მათში ხშირად ვხედავთ ისეთ პრობლემებს, რომლის მსგავსსაც მათი შექმნის მომენტში ალბათ ვერ ვნახავდით. ეს ეხება რასობრივ, გენდერულ და ლგბტქ საკითხებს. TCM-ის ხუთი წამყვანი მეოცე საუკუნეში შექმნილ ამ ფილმებს 21-ე საუკუნის პერსპექტივით განიხილავს. მიზანი ისაა, რომ ფილმები ცენზურის ქვეშ არ მოყვნენ, ამის ნაცვლად კი, მდიდარი ისტორიული კონტექსტი წავუმძღვაროთ თითოეულ კლასიკურ ნაწარმოებს", — ნათქვამია მაუწყებლის განცხადებაში.

წარმოდგენილი ფილმების ნაწილში ქალისა და კაცის როლის მკვეთრად განსხვავებულია დღევანდელი რეალობისგან; სხვა სენსიტიური თემები, მაგალითად, ლგბტქ საკითხები, უხეშადაა წარმოჩენილი. ზოგიერთში ჰომოსექსუალობა ფსიქიკურ აშლილობადაც კია წარმოდგენილი, თუმცა, არხი ირწმუნება, რომ ყველა მათგანს სრულად აჩვენებენ, მეტიც — სარეკლამო ჭრების გარეშე.

არხის ერთ-ერთი წამყვანი, დეივ კერგერი ამბობს, რომ ეგრეთ წოდებული "cancel culture", იგივე "გადახაზვის კულტურა", რაც ცნობილი ადამიანებისა და ნაწარმოებების საზოგადოებრივი ცხოვრებიდან ამოშლას ისახავს მიზნად, მიუღებელია. ამის ნაცვლად "გადახაზვა", შესაძლოა, "[თემის] გაშლით", "განხილვით" ან სხვა "გ"-ზე დაწყებული სიტყვებით ჩანაცვლდეს.

ამგვარ მიდგომას ტელეარხზე "ნაცრისფერ ზონას" უწოდებენ — როცა კლასიკად ქცეულ ფილმებს უყურებ და გიყვარს, თუმცა ახლებურად იაზრებ.

"ეს ფილმები იმ დროის ერთგვარი კაფსულებია, როცა ისინი გადაიღეს", — ამბობს წამყვანი ალიშა მელოუნი, — "მათით შეგვიძლია, შევიტყოთ, როგორი საზოგადოება არსებობდა მაშინ, როგორი არსებობს — ახლა და რამდენი რამის გაკეთებაა ჯერ კიდევ საჭირო".