ბათუმში, მიკროავტობუსის მძღოლები მგზავრობის ტარიფი გაზრდას ითხოვენ. ამ დროისთვის ბათუმში მიკროავტობუსით მგზავრობის ფასი 50 თეთრია. მძღოლები ტარიფის 20-30 თეთრით გაზარდას მოითხოვენ, ამის მიზეზად კი საწვავისა და ზოგადად, სურსათის გაძვირებულ ფასს ასახელებენ.

"ჩემს უკან დგას ოჯახის 6 წევრი. წარმოიდგინეთ, რამდენი ოჯახის წევრი არის ამ მძღოლების უკან, რომლებიც ელოდებიან ჩვენი ნამუშევარის შეტანას ოჯახში, რომ ვიარსებოთ. ეს არის მინიმალური საარსებო წყაროს მოთხოვნა", — განაცხადა აქციის ერთ-ერთმა მონაწილემ გაზეთ ბათუმელებთან საუბარში.

"ადრე საწვავის დაბალი ფასი იყო. დღეს საწვავის ნებისმიერ სადგურთან რომ მივიდეთ, [ფასი] არის ყველაზე ცოტა 3 ლარი. 3 ლარის ხარჯით და 50 თეთრით, ჩვენი სამარშრუტო ხაზი ძალიან ძვირი გვიჯდება. მით უმეტეს, ერთ წრეზე გავდივართ 28 კილომეტრს", — ამბობს აქციის ერთ-ერთი მონაწილე აჭარის ტელევიზიასთან საუბარში.

მიკროავტობუსი მძღოლები აქცია ჯერ აჭარის საზოგადოებრივ მაუწყებელთან შეიკრიბნენ და შემდეგ გადაინაცვლეს ბათუმის მერიასთან. ისინი ტელევიზიისგან ეთერის დათმობას ითხოვდნენ, რათა საზოგადოებამდე სწორად მიეტანათ მათი პროტესტის საფუძველი და მიზანი.

"აჭარის ტელევიზიასთან იმიტომ ვართ მოსულები, რომ მოსახლეობამდე სწორი ინფორმაცია მივიდეს. არასწორი ინფორმაციის მისვლის გამო ჩვენ ვილანძღებით. ხშირია, ჩვენზე წამოსული რისხვა, რომ რა გაძვირება, როგორ გაძვირება [...] დაახლოებით 15 წელია, რაც ეს ფასი არის ჩვენი ტარიფი. თქვენ წარმოიდგინეთ, 15 წლის განმავლობაში რამდენად არის ცხოვრება გაძვირებული. ჩვენც გაგვიძვირდა ცხოვრება, რა თქმა უნდა. ჩვენც ამ ქვეყნის შვილები ვართ, ამ ქვეყნის მოქალაქეები ვართ. ჩვენც გაგვიძვირდა ყველაფერი", — ამბობს აქციის ერთ-ერთი მონაწილეა გაზეთ ბათუმელებთან საუბარში.

ორგანიზაცია ადამიანის უფლებებისათვის ხელმძღვანელის, თამაზ ბაკურიძის ინფორმაციით, რომელიც მიკროავტობუსის მძღოლებს აქციის ორგანიზებასა და ქალაქის თვითმმართველობასთან კომუნიკაციაში ეხმარება, ბათუმის მერიის წარმომადგენლები დღეს აქციის 10 მონაწილეს შეხვდებიან და მათ პრობლემებს მოისმენენ.