ნაციონალური მოძრაობის ერთ-ერთი ლიდერის, სალომე სამადაშვილის განცხადებით, ევროპელი მოკავშირეებისა და სტრატეგიული პარტნიორების შეშფოთება ქვეყანაში შექმნილ ვითარებასთან დაკავშირებით ძალიან მაღალია.

"ყველას ესმის, რომ პოლიტიკური კრიზისიდან გამოსავალი არის აუცილებლად მოსაძებნი იმიტომ, რომ წინააღმდეგ შემთხვევაში ის პროცესები, რაც ქვეყანაში შეიძლება განვითარდეს აწყობს მხოლოდ და მხოლოდ რუსეთს. ამიტომ, ევროკავშირს პოლიტიკური კრიზისის დაძლევაში ჩვენს ქვეყანაში აქვს გეოპოლიტიკური და გეოსტრატეგიული ინტერესი. სწორედ ამიტომ, ჩვენ გვქონდა ძალიან საფუძვლიანი საუბარი როგორც იმაზე, თუ როგორ შეიძლება, რომ ევროკავშირის ფუნქცია გაძლიერდეს ამ კრიზისიდან გამოსავლის მოსაძებნად, ასევე, იმ მთავარ პრობლემებზე, რომელსაც დღეს ჩვენ ვხედავთ კრიზისიდან გამოსავლის თვალსაზრისით. ეს, რა თმა უნდა, არის პოლიტიკური პატიმრების თემა. კიდევ ერთხელ მინდა ვთქვა, რომ ნიკა მელიდა და გიორგი რურუა უნდა გათავისუფლდნენ იმისთვის, რომ ჩვენ დავიწყოთ ამ პოლიტიკური კრიზისიდან გამოსავლის მოძებნა და მეორე ქვეყანას სჭირდება ახალი, განახლებული დემოკრატიული პროცესი და ეს პროცესი შეიძლება იყოს ახალი საპარლამენტო არჩევნები", — განაცხადა სამადაშვილმა.

ევროპული საბჭოს პრეზიდენტი, შარლ მიშელი საქართველოში გუშინ ჩამოვიდა და დღეს, დილიდან ოფიციალურ შეხვედრებს მართავს. იგი უკვე შეხვდა საქართველოს პრეზიდენტს, სალომე ზურაბიშვილს და იმყოფებოდა საოკუპაციო ხაზთან.

გაიგეთ მეტი: