ევროპული საბჭოს პრეზიდენტის, შარლ მიშელის განცხადებით, ყველაფერს გააკეთებს იმისათვის, რომ საქართველოს კორონავირუსის ვაქცინის დოზებზე წვდომა მალე ჰქონდეს. მიშელის თქმით, ამ მომენტში მთავარი გამოწვევა ვაქცინაციაა.

"ვაქცინაცია არის მთავარი გამოწვევა ამ მომენტში. ევროკავშირი არის მთავარი დონატორი კოვაქვს პროგრამის და იმედი მაქვს, ამ ქვეყანაშიც იქნება დისტრიბუცია ვაქცინების და ყველაფერს გავაკეთებ იმისათვის, რომ საქართველოს მალე ჰქონდეს დოზებზე წვდომა.

800 მილიონი ევროს მობილიზება მოხდა მთლიანად ბოლო პერიოდში სოფლის მეურნეობის სფეროებისთვის, რომელიც არის ძალიან მნიშვნელოვანი ნაწილი ამ ევროკავშირის დახმარებისა", — განაცხადა მიშელმა.

საქართველოს პრეზიდენტ სალომე ზურაბიშვილთან შეხვედრის შემდეგ მან საქართველოს ტერიტორიული მთლიანობის მტკიცე მხარდაჭერაზეც ისაუბრა.

"ჩვენ, ასევე, ვისაუბრეთ კონფლიქტებთან დაკავშირებითაც. კიდევ ერთხელ ვაფიქსირებ ევროკავშირის მყარ მხარდაჭერას საქართველოს ტერიტორიულ მთლიანობასთან დაკავშირებით. ძალიან მნიშვნელოვანია ერთიანობა, ძირითად ღირებულელებთან დაკავშირებით გაერთიანება და ამაში, რა თქმა უნდა, თქვენ შეგიძლიათ ევროკავშირის ჩართულობის იმედი გქონდეთ", — აღნიშნა ევროპული საბჭოს პრეზიდენტმა.

ევროპული საბჭოს პრეზიდენტი სამუშაო შეხვედრებს გამართავს, ასევე, პრემიერმინისტრთან, პარლამენტის თავმჯდომარესთან და სხვადასხვა პარტიის წევრებთან. გარდა ამისა, შარლ მიშელის პატივსაცემად პრეზიდენტ სალომე ზურაბიშვილის სახელით მოეწყობა სადილი. ამასთან, იგი საოკუპაციო ხაზთანაც მივა.

ევროპული საბჭოს პრეზიდენტი საქართველოში პოლიტიკური კრიზისის ფონზე ჩამოვიდა. თითქმის ერთი კვირის წინ, ნაციონალური მოძრაობის ლიდერი ნიკა მელია დააკავეს, რასაც ევროპელი და ამერიკელი პარტნიორების მხრიდან კრიტიკა და შეშფოთება მოჰყვა.

24 თებერვალს 6-მა ევროპარლამენტარმა მიშელს წერილით მიმართა და საქართველოში ვიზიტამდე, მიმდინარე ბოლოდროინდელ მოვლენებზე რეაგირება მოსთხოვა.

როგორც ერთობლივ წერილშია აღნიშნული, ნაციონალური მოძრაობის ლიდერის, ნიკა მელიას დაკავების შემდეგ, ქართულ ოცნებასა და ოპოზიციას შორის დაპირისპირებამ სახიფათო დონეს მიაღწია. ისინი მოუწოდებდნენ მიშელს, ვიზიტი გამოიყენოს იმისთვის, რომ მხარეებს დიალოგისკენ მოუწოდოს.