ჯანდაცვის მინისტრის მოადგილის, თამარ გაბუნიას განცხადებით, მეორე კვირაა Covax-ისა Pfizer-ისგან სამმხრივ ზარს ელოდებიან, რათა დაზუსტდეს ფინანსური გადაზღვევა რას გულისხმობს. მისივე თქმით, Pfizer-ის ვაქცინის შემოტანის პროცესის გაჭიანურება ფინანსურ გადაზღვევასთან არის დაკავშირებული. დამატებითი დეტალები სატელეფონო ზარით უნდა დაზუსტდეს, რომელსაც 23 თებერვლის შემდეგ ელოდებიან.

"მეორე კვირაა ველოდებით სამხრივ ზარს, რომ დაზუსტდეს ეს ფინანსური გადაზღვევა რას გულისხმობს. ეს არ იყო სწორედ დაზუსტებული იმ ხელშეკრულებაში, რომელიც ჩვენ მივიღეთ და ჩაითვალა, რომ უნდა დაზუსტდეს მხოლოდ სატელეფონო კონსულტაციის შედეგად. ამდენად ამ კვირაში გაიმართება ეს სატელეფონო კონსულტაცია, ჩვენ საბოლოოდ ჩამოვყალიბდებით ყველა პირობაზე, რომელსაც Pfizer-ი დამატებით აყენებს ქვეყნის მიმართ. კიდევ ერთხელ გავიმეორებ, რომ ეს არ უკავშირდება ქვეყნის ტექნიკურ მზაობას ვაქცინა მიიღოს, ან სწორად მოახდინოს მისი ადმინისტირება", — განაცხადა გაბუნიამ.

მან, ასევე, თქვა, რომ საქართველოში ვაქცინების მოწოდება 2 ან 3 კვირით გადავადდება. გაბუნია ამას Pfizer-ის მხრიდან დამატებითი მოთხოვნების დაყენებით ხსნის.

საქართველოში Covid-19-ზე ვაქცინა, ჯერჯერობით, არ შემოსულა. პირველი ვაქცინა, რომელიც საქართველოში უნდა შემოსულიყო Pfizer-ია. ჯანდაცვის სამინისტროში აცხადებდნენ, რომ თებერვლის ბოლოს საქართველო 29 250 დოზა Pfizer-ის ვაქცინას მიიღებდა, რომელიც 14 500-მდე სამედიცინო პერსონალზე იქნებოდა გათვლილი.

ჯანდაცვის მინისტრის მოადგილე, თამარ გაბუნია ამბობდა, რომ COVAX პლატფორმის ფარგლებში, დაახლოებით, მარტის დასაწყისში AstraZeneca-ს 315 000 დოზა შემოვიდოდა. ხოლო AstraZeneca-სთან პირდაპირი მოლაპარაკებების საფუძველზე, გაბუნიას თქმით, საქართველო 150 ათას დოზა ვაქცინას მიიღებდა.

გაიგეთ მეტი: