რამდენიმე დღის წინ შეიარაღებული თავდასხმისას ლედი გაგას ორი ძაღლი გაიტაცეს და მათ გამსეირნებელს 4-ჯერ ესროლეს, 27 თებერვალს კი ლოს-ანჯელესის პოლიციამ განაცხადა, რომ ფრანგული ბულდოგები უვნებლად დააბრუნეს.

The Guardian-ის ცნობით, 26 თებერვლის საღამოს პოლიციაში უცნობმა ქალმა ძაღლები მიიყვანა და სამართალდამცავებმა ამოიცნეს, რომ ისინი ნამდვილად პოპვარსკვლავის ოთხფეხა მეგობრები იყვნენ.

გამომძიებლის თქმით, უცნობი ქალი, რომლის ვინაობაც ჯერ არ გახმაურებულა, ძაღლების გატაცებასთან დაკავშირებული არ არის. თუმცა საიდან აღმოჩნდნენ მასთან ცხოველები, ჯერ უცნობია — გამოძიება გრძელდება და უახლოეს მომავალში უფრო დეტალურ ანგარიშს წარუდგენენ ფართო საზოგადოებას.

ლედი გაგა ამჟამად რომში იმყოფება ფილმის გადაღებებზე და ბოროტმოქმედებს ძაღლების უვნებლად დაბრუნების სანაცვლოდ 500 000 დოლარს ჰპირდებოდა.

ჯერჯერობით უცნობია, ეს თანხა გადაეცა თუ არა ვინმეს.

ფრანგული ბულდოგები მაშინ გაიტაცეს, როცა ლედი გაგას ძაღლების გამსეირნებელი, რაიან ფიშერი მათთან ერთად ქუჩაში იყო: მოულოდნელად მანქანიდან შეიარაღებული პირები გადმოვიდნენ, ფიშერს ცეცხლსასროლი იარაღიდან გულმკერდის არეში ესროლეს და ორი ძაღლი — კოჯი და გუსტავი — გაიტაცეს. როგორც BBC წერს, მესამე ბულდოგმა, სახელად აზია, გაქცევა მოახერხა და მოგვიანებით პოლიციამ უვნებლად იპოვა.

ძაღლის გამსეირნებელი მძიმედ დაშავდა და კრიტიკულ მდგომარეობაში იყო, თუმცა როგორც ექიმები ოჯახის წევრებს ჰპირდებიან, უკვე ყველაფერი სტაბილურადაა და სრულად გამოჯანმრთელებასაც შეძლებს.

"ყოველთვის ძალიან მეყვარები, რაიან ფიშერ, რადგან შენი სიცოცხლე გარისკე, რომ ჩვენი ოჯახი გადაგერჩინა. შენ სამუდამოდ გმირი იქნები", — ასე მიმართა ლედი გაგამ მას სოციალურ ქსელებში.