პენსილვანიის მცხოვრებ რიჩარდ მიშეტს, რომელიც იანვარში ამერიკის კონგრესის შენობის დარბევაში მონაწილეობდა, პატიმრობა ელის. მის შესახებ გამოძიების ფედერალურ ბიუროს, არც მეტი, არც ნაკლები — მიშეტის ყოფილმა შეყვარებულმა შეატყობინა. როგორც აღმოჩნდა, ტექსტურ შეტყობინებაში მიშეტმა მას "სულელი" უწოდა.

როდესაც ქალი სამართალდამცავმა ორგანოებმა დაკითხეს, მან მტკიცებულებად კაპიტოლიუმის დარბევის დღეს ყოფილი შეყვარებულისგან მიღებული შეტყობინებები გადასცა.

"თუ ვერ ხედავ, რომ არჩევნები გაყალბდა, სულელი ხარ", — წერდა მიშეტი ყოფილ შეყვარებულს.

მიშეტს ბრალად საზოგადოებრივი წესრიგის დარღვევა, შენობაში შეღწევა და კონგრესის საქმიანობისთვის ხელის შეშლა ედება. ბრალის დამტკიცების შემთხვევაში, მას 20 წლამდე პატიმრობა ემუქრება. მიშეტის გარდა, საქმე კაპიტოლიუმის დარბევაში მონაწილე 200-ზე მეტი ადამიანის მიმართაა აღძრული.

ტრამპის მხარდამჭერები კაპიტოლიუმში 6 იანვარს შეიჭრნენ. დემონსტრანტების შეჭრის პარალელურად, აშშ-ის კონგრესში მიმდინარე სხდომა შეჩერდა. სხდომაზე საპრეზიდენტო არჩევნების შედეგები უნდა დაემტკიცებინათ. სწორედ ამას აპროტესტებდნენ ტრამპის მხარდამჭერები, რადგან ისინი, ყოფილი პრეზიდენტის მსგავსად, შედეგებს არ აღიარებდნენ.

კაპიტოლიუმში შეჭრას 5 ადამიანის სიცოცხლე ემსხვერპლა, მათ შორის — ერთი პოლიციელის. შენობაში გადაადგილება პარალიზებული იყო, რის გამოც სენატორებს, თანამშრომლებსა და ჟურნალისტებს მიწისქვეშა გვირაბების გამოყენება მოუხდათ. მოვლენების ფონზე, ვაშინგტონში 1 დღით კომენდანტის საათი გამოცხადდა, ჯამში კი 140-ზე მეტი ადამიანი დაშავდა.