ლელოს თავმჯდომარე, მამუკა ხაზარაძე ამბობს, რომ საქართველოს ყველა მოქალაქე არის თანაბარუფლებიანი, განურჩევლად მრწამსისა თუ სექსუალური ორიენტაციისა და ფიქრობს, რომ კანონი ყველასთვის ერთი უნდა იყოს. ხაზარაძე აღნიშნავს, რომ ძალადობა ან კანონდარღვევა ყველასგან მიუღებელია, მიუხედავად იმისა, აცვია თუ არა მას ანაფორა.

ლგბტქ ადამიანების უფლებების დარღვევასა და სასულიერო პირების მხრიდან გამოხატულ აგრესიაზე ხაზარაძემ პლატფორმა Clubhouse-ის ერთ-ერთ ოთახში პირდაპირი საუბრები მამუკასთან On.ge-ს კითხვის პასუხად ისაუბრა.

ჟურნალისტი: თუ თქვენ ხელისუფლებაში მოხვალთ, მზად ხართ თუ არა, რომ დაიცვათ ადამიანები განურჩევლად იმისა, რა მრწამსის ან ორიენტაციის არიან? მაგალითად, ყველაზე ცნობილი შემთხვევა რომ განვიხილოთ, დაისჯება თუ არა სათანადოდ მამაო, რომელიც "ტაბურეტკით" უზღუდავს ადამიანს გამოხატვის თავისუფლებას?

ხაზარაძე: ჩემთვის საქართველოში ადამიანი არის რელიგიური მრწამსის, ასე ვთქვათ, უმცირესობა თუ სექსუალური თუ ა.შ. არ აქვს მნიშვნელობა, ჩემთვის ეს ადამიანები არიან საქართველოს მოქალაქეები და საქართველოს მოქალაქეებისთვის კანონი უნდა იყოს ყველასთვის ერთნაირი. არ აქვს მნიშვნელობა, ვის ანაფორა აცვია, ბოდიში ყველასთან, არ მინდა ასე ვთქვათ, განზოგადებულად ვთქვა, ან ვიღაცა ძალადობს, ნებისმიერი კანონდარღვევა უნდა იქნას დასჯილი.

2013 წლის 17 მაისს ჰომოფობიასთან ბრძოლის საერთაშორისო დღეს, სასულიერო პირებმა, მრევლთან ერთად, ჰომოფობიური აქცია გამართეს. ისინი ლგბტ აქტივისტებს თავს დაესხნენ, გაარღვიეს პოლიციის კორდონი და დაარბიეს მშვიდობიანი მოქალაქეები. ერთ-ერთი სასულიერო პირი კი, მოქალაქეებს "ტაბურეტკით" მისდევდა და აგინებდა.

აქტივისტები ტერიტორიას პოლიციამ განარიდა. თუმცა მრევლს ალყა ჰქონდა შემორტყმული იმ სამარშრუტო ტაქსებსა და ავტობუსებზეც, რომლებშიც ისინი ისხდნენ.

დღემდე, ლგბტ ადამიანებს საქართველოში გამოხატვის თავისუფლება ეზღუდებათ და ეს ყველაზე ცხადად ჩანს 17 მაისს. მშვიდობიან მოქალაქეებს სახელმწიფო პროტესტის გამოსახატად ან შემოსაზღვრულ ტერიტორიას, ან დახურულ სივრცეს სთავაზობს, თუმცა ვერც ასეთ დროს უზრუნველყოფს აქციის მონაწილეების უსაფრთხოებას. 2019 წელს შინაგან საქმეთა სამინისტრომ უარი უთხრა თბილისი პრაიდის საორგანიზაციო ჯგუფს, ღირსების მარშის უსაფრთხოების დაცვაზე ღია სივრცეში.