თბილისის მერი და ქართული ოცნების გენერალური მდივანი პრემიერის გადადგომას, ვიცე-პრემიერის შეცვლას და ახალი პრემიერობის კანდიდატს გამოეხმაურა — გახარიას და ცქიტიშვილს მადლობა გადაუხადა, ღარიბაშვილს კი წარმატება უსურვა. კალაძემ ისურვა, რომ ღარიბაშვილმა პოლარიზაციის დაძლევა შეძლოს.

"მინდა, ირაკლის წარმატებები ვუსურვო. ვისურვებდი, რომ ის ყოფილიყოს ქვეყნის და საზოგადოების გამაერთიანებელი და დამასრულებელი არსებული პოლარიზაციის, რაც ძალიან ცუდია ქვეყნისთვის და მისი განვითარებისთვის", — აღნიშნა მან.

წასულებზე საუბრისას კი კალაძეს ბევრი არ უსაუბრია და მხოლოდ მადლობით შემოიფარგლა.

"რაც შეეხება ქალბატონ მაიას, ეს იყო მისი გადაწყვეტილება. მადლობა მას გაწეული საქმიანობისთვის. მინდა გიორგი გახარიას მადლობა გადავუხადო, ის იყო ჩვენი ქვეყნის პრემიერი და მადლობა მას", — თქვა კალაძემ.

კალაძისგან განსხვავებით ოპოზიცია ფიქრობს, რომ ღარიბაშვილი პოლარიზაციას გააღრმავებს, რადგან ოპოზიციისადმი აგრესიული რიტორიკითაა ცნობილი. თავად ღარიბაშვილმაც პირველივე გამოსვლაში პრემიერმინისტრობის კანდიდატის რანგში განაცხადა, რომ ქვეყანაში წესრიგს აღადგენენ. სავარაუდოდ, ამ ფორმით ის გამოეხმაურა ნიკა მელიას საქმეს.

შეგახსენებთ, რომ ირაკლი ღარიბაშვილი პრემიერობის კანდიდატად ექსპრემიერის, გიორგი გახარიას გადადგომის შემდეგ წარადგინეს. გახარიამ წასვლის მიზეზად სწორედ ნიკა მელიას საქმეზე პოზიციების შეუთანხმებლობა დაასახელა.