ნაციონალური მოძრაობის თავმჯდომარის, ნიკა მელიას შეფასებით, ქართული ოცნების პრემიერობის თავმჯდომარე, ირაკლი ღარიბაშვილი კონფლიქტის განსახიერებაა და მისთვის ორგანულია ზიზღის ენა. ასე უპასუხა მან ჟურნალისტების კითხვას, როგორ ხედავს მოლაპარაკების შანსებს მისი მმართველობით ხელისუფლებასთან.

"ადამიანი, რომელიც მხოლოდ და მხოლოდ არის დაკავებული ისედაც, სამწუხაროდ, ურთიერთდაპირისპირებული საზოგადოებრივ ჯგუფებს შორის ღვარძლის გაღვივებით და ვითარების დაძაბვით. თავიდან ბოლომდე ბატონი ღარიბაშვილი გახლავთ განსახიერება კონფლიქტისა, რომლისთვისაც არის ორგანული ზიზღის ენა. ეს ბატონი დემონსტრირებს, რომ ის გახლავთ მხოლოდ და მხოლოდ ერთი ადამიანის მორჩილი და იგი არ ცნობს განსხვავებულ პოზიციას საქართველოში, არ ცნობს ოპოზიციიას და სამოქალაქო საზოგადოებას", — განაცხადა მელიამ.

17 თებერვალს თბილისის საქალაქო სასამართლომ დააკმაყოფილა პროკურატურის მოთხოვნა და ნაციონალური მოძრაობის თავმჯდომარეს, ნიკა მელიას აღკვეთის ღონისძიების სახით პატიმრობა შეუფარდა. საქმეს მოსამართლე ნინო ჩახნაშვილი განიხილავდა. აღსანიშნავია, აღკვეთის ღონისძიების შეფარდება არ ნიშნავს საბოლოო გადაწყვეტილებას — განხილვები ამის შემდეგაც უნდა გაგრძელდეს და სასამართლოს მაქსიმუმ 9-თვიანი ვადა აქვს, რომ საბოლოო ვერდიქტი გამოიტანოს.

მთელი ღამის განმავლობაში ნაციონალური მოძრაობის ოფისში ოპოზიციური პარტიების ლიდერები იმყოფებოდნენ. ისინი აცხადებენ, რომ ხელისუფლებას მელიას დაკავების საშუალებას არ მისცემენ. 18 თებერვალს, დილით პოლიცია ენმ-ის ოფისთან მივიდა, თუმცა აქტივისტებმა შენობაში არ შეუშვეს. ამის შემდეგ შსს-მ გავრცელა განცხადება და პოლიტიკოსებსა და მხარდამჭერებს მოუწოდა, პოლიციას ხელი არ შეუშალონ სასამართლოს გადაწყვეტილების აღსრულებაში.

ნიკა მელიასთვის პატიმრობის შეფარდებიდან რამდენიმე საათში, საქართველოს პრემიერმინისტრი, გიორგი გახარია გადადგა. მან გადადგომის მიზეზად სწორედ ამ საქმესთან დაკავშირებით გუნდში არსებული აზრთა სხვადასხვაობა დაასახელა. პრემიერის გადადგომის შემდეგ შინაგან საქმეთა სამინისტრომ აღსრულების ღონისძიება გადადო.

ქართულმა ოცნებამ პრემიერმინისტრობის კანდიდატად ექსპრემიერი ირაკლი ღარიბაშვილი წარადგინა.