ევროპული საქართველოს წევრის, ოთო კახიძის განცხადებით, პრემიერობის კანდიდატად ირაკლი ღარიბაშვილის წარდგენა მმართველ გუნდში კვალიფიციური კადრების დეფციტზე მიანიშნებს. ამის შესახებ მან ნაციონალური მოძრაობის ოფისში განაცხადა.

"ღარიბაშვილის პრემიერობაზე წარდგენა ნიშნავს იმას, რომ ქართულ ოცნებაშიც არის სერიოზული დეფიციტი კვალიფიციური კადრების. ბატონი ღარიბაშვილი ერთხელ უკვე იყო პრემიერმინისტრი, სანამ მას მოხსნიდნენ თანამდებობიდან. მისი პრემიერობა გამოირჩეოდა ოპოზიციურ ოფისებზე თავდასხმებით, ძალადობრივი რიტორიკით და სკოლოს ბავშვებისთვის წამებისა და არადამიანური მოპყრობის კადრების ჩვენებით. ამას აორგანიზებდა, როცა იყო პრემიერი", — აღნიშნა კახიძემ.

ქართული ოცნების პრემიერმინისტრობის კანდიდატი ირაკლი ღარიბაშვილი იქნება. ამის შესახებ ქართული ოცნების პოლიტსაბჭოს სხდომის შემდეგ გახდა ცნობილი. იმ შემთხვევაში, თუ პარლამენტი მთავრობის ახალ შემადგენლობას დაამტკიცებს, ღარიბაშვილი პრემიერმინისტრი უკვე მეორედ გახდება.

ქართული ოცნების თავმჯდომარის, ირაკლი კობახიძის განცხადებით, ღარიბაშვილი პოლიტსაბჭოს მან წარუდგინა და გადაწყვეტილება ერთხმად მიიღეს. მისივე განცხადებით, ღარიბაშვილის მინისტრობისა და პრემიერმინისტრობისას განხორციელდა უმნიშვნელოვანესი რეფორმები, ის არის "გამორჩეული გამოცდილების მქონე პროფესიონალი", რომელსაც შეუძლია წარმატებით გაუძღვეს მთავრობის საქმიანობას და იზრუნოს იმ გამოწვევებზე, რომლებიც ქვეყნის წინაშე დგას.

მმართველმა გუნდმა კანდიდატი პრემიერმინისტრ გიორგი გახარიას გადადგომიდან რამდენიმე საათში წარადგინა. გახარიამ პოსტი 18 თებერვლის დილას დატოვა და ამის მიზეზად ნიკა მელიას საქმეზე თანაგუნდელებთან აზრთასხვადასხვაობა დაასახელა.

გიორგი გახარიას თქმით, მისი ურყევი პოზიციაა, რომ "ერთი კონკრეტული ადამიანის მიმართ თუნდაც კანონიერი, მართლმსაჯულებით განსაზღვრული ღონისძიების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან საერთოდ ქვეყანაში ქმნის პოლიტიკური ესკალაციის შესაძლებლობას, არის მიუღებელი".