მთავარი პროკურატურა მოსამართლეების საქმიანობაში უხეში ჩარევის შესაძლო ფაქტთან დაკავშირებით საქართველოს პროკურატურაში მიმდინარე გამოძიების შუალედური შედეგებს აქვეყნებს.

პროკურატურის გამოძიების შედეგები

პროკურატურის მტკიცებით, 2017 წლის 11 იანვარს, უზენაესი სასამართლოს მოსამართლეებმა ბესარიონ ალავიძემ და პაატა ქათამაძემ საცხოვრებელი სახლის მისამართებზე დ. საყვარელიძის სახელით მიიღეს წერილობითი მიმართვები, რომლითაც მიმართვების ავტორი მოსამართლეებს სთავაზობს გარკვეული ქმედებების განხორციელებას და ამ ქმედებების სანაცვლოდ არამართლზომიერ სარგებელს.

ასევე, გამოძიების ვერსიით, მოსამართლეებმა საკუთარ მობილურ ტელეფონებზე უცხოური მობილური ტელეფონის ნომრიდან მიიღეს მსგავსი ხასიათის მოკლე ტექსტური შეტყობინებები.

ბესარიონ ალავიძემ და პაატა ქათამაძემ მიღებული მიმართვებისა და სატელეფონო შეტყობინებების შესახებ წერილობით აცნობეს უზენაესი სასამართლოს თავმჯდომარეს.

გამოძიებით ვერსიით, ბესარიონ ალავიძესა და პაატა ქათამაძეს მოკლე ტექსტური შეტყობინებები გაეგზავნათ უკრაინული მობილური ტელეფონის ნომრიდან.

პროკურატურის განცხადებით, გამოკითხვისას ორივე მოსამართლემ კატეგორიულად უარყო, გარდა ზემოაღნიშნული შემთხვევისა, მანამდე ან მას შემდეგ, მათ საქმიანობაში ჩარევის ან/და ჩარევის მცდელობის სხვა რაიმე ფაქტის არსებობა.

საქართველოს მთავარი პროკურატურის საგამოძიებო ნაწილში მიმდინარე წლის 14 იანვარს დაიწყო გამოძიება სამართალწარმოების განხორციელებაზე ზეგავლენის მიზნით მოსამართლეების საქმიანობაში უხეში ჩარევის შესაძლო ფაქტზე.

საქმეზე გრძელდება გამოძიება საქართველოს სისხლის სამართლის კოდექსის 364-ე მუხლის მე-2 ნაწილით.

მაღალი საჯარო ინტერესის გათვალისწინებითა და მოსამართლეთა თანხმობით, პროკურატურა ასაჯაროებს იმ დოკუმენტაციასა და შეტყობინებებს, რომლებიც მათი განცხადებით, უზენაესი სასამართლოდან მიიღეს.

მათ შორისაა, უზენაესი სასამართლოს თავმჯდომარის ნინო გვენეტაძის წერილი, სამოქალაქო საქმეთა პალატის თავმჯდოარის მზია თოდუას წერილი, მოსამართლეების ბესარიონ ალავიძისა და პაატა ქათამაძის ერთობლივი განცხადება, ასევე, კიდევ ერთი განცხადება რომელიც მოსამართლეებმა, სავარაუდოდ, დამატებით გააკეთეს და წერილი, რომლის ავტორი ნაბეჭდი ასოებით მითითებულია შემდეგნაირად: "დ. საყვარელიძე". პროკურატურა ასევე აქვეყნებს მობილურ ტელეფონებზე დაფიქსირებულ მოკლე ტექსტურ შეტყობინებებს.