თბილისის საქალაქო სასამართლოში ნიკა მელიას აღკვეთის ღონისძიების გამკაცრებაზე მსჯელობა დაიწყო. პროკურატურა პატიმრობას ითხოვს, ადვოკატები კი მიიჩნევენ, რომ არათუ პატიმრობის, არამედ აღკვეთის ღონისძიების საფუძველი საერთოდ არ არსებობს. მელია პროცესს არ ესწრება.

"დღევანდელ სასამართლო პროცესზე გვექნება ძალიან მყარი სამართლებრივი არგუმენტები, თუ რატომ არის ნიკა მელიას მიმართ შეუძლებელი არათუ პატიმრობის, არამედ რაიმე სახის აღკვეთის ღონისძიების გამოყენება. მიგვაჩნია, რომ აღკვეთის ღონისძიების საფუძვლებით არანაირი რისკები არ არსებობს — არ არსებობს მიმალვის, ახალი დანაშაული ჩადენის ან მტკიცებულებათა განადგურების რისკი. ამ ფონზე, თუნდაც ფორმალური, გირაოზე გირაოს თანხის არგადახდის შემთხვევაში, სასამართლო ნამდვილად მოკლებულია შესაძლებლობას, კანონის მიზნებიდან გამომდინარე, ნიკა მელიას შეუფარდოს პატიმრობა", — განაცხადა გიორგი კონდახიშვილმა ჟურნალისტებთან.

მისივე თქმით, დაახლოებით ორი წლის განმავლობაში მელიას არც მიმალვა უცდია, არც ახალი დანაშაული ჩაუდენია და არც მტკიცებულებები გაუნადგურებია. ადვოკატი აღნიშნავს, რომ კანონი მელიასთან მიმართებით პოლიტიკური მიზანშეწონილობიდან გამომდინარე განიმარტება.

"თუკი სასამართლო დღეს დარჩება სამართლებრივ სივრცეში და თუკი დღევანდელი სასამართლო პროცესი არ გახდება კიდევ ერთი აშკარა მაგალითი პოლიტიკური დევნის და პოლიტიკური დაკვეთის განხორციელების, მაშინ არ უნდა დააკმაყოფილოს პროკურატურის შუამდგომლობა. მთელი ამ ხნის განმავლობაში დასტურდება არა ის, რომ ნიკა მელია არის კანონთან წინააღმდეგობაში, არამედ ის, რომ კანონი ნიკა მელიასთან მიმართებით განიმარტება პოლიტიკური მიზანშეწონილობიდან გამომდინარე. მინდა დავიჯერო, რომ სასამართლო დღეს მაინც დადგება მოწოდების სიმაღლეზე და არ გამოიტანს ისეთ გადაწყვეტილებას, რომელსაც არ ექნება სამართლებრივი საფუძველი. [...] ფაქტობრივად, შეუძლებელია, მოსამართლემ დაასაბუთოს, რატომ უნდა დააპატიმრონ მელია, აღკვეთის ღონისძიების რომელ მიზნებს ექმნება რისკი. ეს არ არის სახეზე", — თქვა კონდახიშვილმა.

ნიკა მელიას აღკვეთის ღონისძიების შეცვლა პროკურატურამ მას შემდეგ მოითხოვა, რაც ენმ-ის ლიდერმა გირაოს მეორედ გადახდაზე უარი თქვა. მელიას უარი ემყარებოდა იმას, რომ ამავე საქმეზე მას ერთხელ უკვე გადახდილი აქვს სასამართლოს მიერ დაკისრებული გირაო. საუბარია 20 ივნისის საქმეზე, როცა სასამართლომ მას გირაო და ელექტრონული სამაჯურის ტარება შეუფარდა. მელიამ სამაჯური ერთ-ერთ აქციაზე დემონსტრაციულად მოიხსნა, რის შემდეგაც პროკურატურამ იგივე საქმეზე გირაო ხელახლა მოითხოვა. მელიას უარის შემდეგ, პროკურატურამ აღკვეთის ღონისძიების გამკაცრების, ანუ პატიმრობის მოთხოვნა დააყენა. ამისთვის მას პარლამენტის ნებართვა სჭირდებოდა, რადგან ბოიკოტის მიუხედავად, მელია კვლავ დეპუტატია. 16 თებერვალს ქართული ოცნების პარლამენტმა ნიკა მელიას დეპუტატის იმუნიტეტი უკვე მეორედ მოუხსნა და პროკურატურამ სასამართლოს იმავე დღეს მიმართა.

ნიკა მელია მთელი ამ დროის განმავლობაში აცხადებდა, რომ გირაოს არ გადაიხდის და ვერ დაიჭერენ. მისი თქმით, საქმე პოლიტიზებულია. არსებული ინფორმაციით, ის ამ წუთებში ერთიანი ნაციონალური მოძრაობის ოფისში იმყოფება, სადაც სხვა ოპოზიციური პარტიების ლიდერებიც მივიდნენ. მათი ნაწილი აცხადებს, რომ ხელისუფლებას მელიას დაკავების საშუალებას არ მისცემენ.

ნიკა მელიას საქმე

ნიკა მელიას საქართველოს პროკურატურა 20 ივნისის აქციის საქმეზე ძალადობრივი ჯგუფის ხელმძღვანელობას ედავება. გამოძიება სისხლის სამართლის კოდექსის 225-ე მუხლის პირველი და მეორე ნაწილით მიმდინარეობს. ამ მუხლით 4-დან 9 წლამდე სისხლისსამართლებრივი პასუხისმგებლობა ძალადობრივი ჯგუფის ხელმძღვანელობისა და მასში მონაწილეობისთვის დგება.

პროკურატურა მელიასთვის პატიმრობას ითხოვდა, თუმცა 2019 წლის 27 ივნისს თბილისის საქალაქო სასამართლომ მას 30 ათასი ლარის ოდენობის გირაო შეუფარდა. გარდა ამისა, მოსამართლემ სხვა შეზღუდვებიც დაუწესა:

• საცხოვრებელი ადგილის (სახლის) დატოვება საგამოძიებო ორგანოს ინფორმირებისა და თანხმობის გარეშე;
• საზოგადოებრივი თავშეყრის ადგილას საჯარო განცხადებების გაკეთება; მოწმეებთან ნებისმიერი სახის კომუნიკაცია;
• დაეკისრა საგამოძიებო ორგანოსთვის პასპორტისა და პირადობის დამადასტურებელი სხვა დოკუმენტის ჩაბარების ვალდებულება.