ქართული ოცნების დეპუტატის, მიხეილ სარჯველაძის მტკიცებით, მართლმსაჯულების განვითარების მხრივ საქართველოში იმდენი არასდროს გაკეთებულა, რამდენიც ბოლო წლების მანძილზე. სარჯველაძემ თქვა, რომ "ხელები შორს" უნდა ჰქონდეთ იმ რეფორმებისგან, რაც რეალურად განხორციელდა. ასე გამოეხმაურა იგი ალეკო ელისაშვილის განცხადებას, რომელმაც საქართველოში არსებულ მართლმსაჯულებას "სამარცხვინო" უწოდა.

"რომელიმე პერსონასთან მიმართებაში ვინმეს შეიძლება განსხვავებული შეხედულება ჰქონდეს, მაგრამ ინსტიტუციური დემოკრატიის განვითარების მხრივ ამდენი საქართველოს ისტორიის მანძილზე არ გაკეთებულა სასამართლო ხელისუფლების დამოუკიდებლობისთვის, რაც გაკეთდა ბოლო რამდენიმე წლის დროს. ამდენად, ხელები შორს იმ რეფორმებთან მიმართებაში, რომელიც რეალურად განხორციელდა და რითაც მივიღეთ ის, რასაც უკეთესი მართლმსაჯულება ჰქვია", — თქვა მან.

პარლამენტის პლენარულ სხდომაზე დღეს ალეკო ელისაშვილმა განაცხადა, რომ მას ქართული ოცნების დამფუძნებელზე, ბიძინა ივანიშვილზე მეტად, სამართლიანობის კუთხით იუსტიციის ყოფილი მინისტრი, თეა წულუკიანი "ეიმედებოდა", თუმცა შედეგად "სამარცხვინო მართლმსაჯულება" მიიღეს.