საქართველოს ფინანსთა სამინისტროს საგამოძიებო სამსახურმა სხვისი სასაქონლო ნიშნის მართლსაწინააღმდეგოდ გამოყენების ფაქტები გამოავლინა. ამის შესახებ ინფორმაციას უწყების პრესსამსახური ავრცელებს.

მათივე ინფორმაციით, გამოძიებით დადგინდა, რომ საქართველოს რამდენიმე მოქალაქეს, სხვადასხვა ქვეყნიდან შემოჰქონდა სარეცხი საშუალებები და მოწყობილ საწარმოებში Henkel-ისა და Procter & Gamble Co-ის ბრენდირებული პროდუქტებს - PERSIL Expert Color-ს, PERSIL Vernel-სა და ARIEL-ს კუსტარულად ამზადებდნენ.

“საგამოძიებო სამსახურის მიერ, კუსტარულად მოწყობილი საწარმოებიდან და სავაჭრო ქსელიდან ამოღებულია დიდი ოდენობით ფალსიფიცირებული სარეცხი საშუალებები და ის ტექნიკური აღჭურვილობა, რისი საშუალებითაც ხდებოდა ბრენდირებული სარეცხი საშუალებების ფალსიფიცირება,“ - აღნიშნულია საქართველოს ფინანსთა სამინისტროს საგამოძიებო სამსახურის მიერ გავრცელებულ პრესრელიზში.

უწყება გამოძიებას საქართველოს სისხლის სამართლის კოდექსის 196-ე მუხლის პირველი ნაწილით ატარებს. ამ მუხლის მიხედვით, დიდი ოდენობით სხვისი სასაქონლო ნიშნის უკანონო დამზადება, ან მათი სხვაგვარი უკანონო გამოყენება, აგრეთვე, სხვისი სასაქონლო ნიშნით რეგისტრირებული საფირმო სახელწოდებით უკანონოდ ნიშანდებული (მარკირებული) საქონლის წარმოება, ან სამოქალაქო ბრუნვაში შეტანა, რამაც მნიშვნელოვანი ზიანი გამოიწვია, ისჯება ჯარიმით ან გამასწორებელი სამუშაოთი ვადით ორ წლამდე ან თავისუფლების აღკვეთით იმავე ვადით.