სუპერგმირებზე გადაღებული ფილმების გულშემატკივრები უკვე დიდი ხანია ელოდებიან სამართლიანობის ლიგის (Justice League) რეჟისორ ზაკ სნაიდერისეული ვერსიის ხილვას, სულ ცოტა ხნის წინ გამოსული ფინალური ტრეილერი კი ამ მოლოდინს კიდევ უფრო ამძაფრებს.

ახალ ტრეილერში სამართლიანობის ლიგასა და დარქსაიდს შორის გამართული ეპიკური ბრძოლის სცენების ხილვასთან ერთად ბენ აფლეკის ბეტმენისა და ჯარედ ლეტოს ჯოკერს შორის გამართული დიალოგის ნაწყვეტიც გვესმის: "ჩვენ ისეთ საზოგადოებაში ვცხოვრობთ, სადაც ღირსება შორეულ წარსულში დარჩა, არა, ბეტმენ?"

ფილმის სიუჟეტი ბეტმენის, სუპერმენის, ვანდერ ვუმენის, აქვამენის, ფლეშისა და კიბორგის ერთი მიზნის ქვეშ გაერთიანებული ჯგუფის შესახებ მოგვითხრობს, რომელსაც ბნელი ძალებისგან სამყაროს გადარჩენა სურს. აღსანიშნავია, რომ ასევე ვიხილავთ ჯარედ ლეტოს ჯოკერს, რომლის პირველი ფოტოები უკვე გავრცელდა კიდეც.

ორიგინალი სამართლიანობის ლიგა 2017 წელს გამოვიდა, რომელიც რეჟისორმა ზაკ სნაიდერმა გადაიღო, თუმცა ფილმის დამუშავებას და საბოლოო სახის მიცემას ის გამოეთიშა, რადგან მოულოდნელად შვილი გარდაეცვალა. ამის გამო კინოსტუდიამ მისგან დამოუკიდებლად მიიღო გადაწყვეტილებები, შეცვალა მონტაჟი, მთელი რიგი სცენები ამოჭრა და ა.შ.

ფილმის შემოსავლებმა $657,9 მილიონს მიაღწია და შერეული შეფასებები მიიღო. 2018 წელს სნაიდერის ფანებმა მოითხოვეს, რომ ფილმის მისეული ვერსიის ხილვის შესაძლებლობაც მიეცათ და ასეც მოხდა: სულ მალე, 18 მარტს გამოვა სწორედ ისეთი სამართლიანობის ლიგა, როგორიც თავიდანვე ჰქონდა ჩაფიქრებული თავად რეჟისორს.