2019 წელს მედია სასექსის ჰერცოგინიის, მეგან მარკლის მამისადმი მიწერილმა წერილმა მოიცვა, რომელიც ბრიტანულმა ტაბლოიდმა, Mail on Sunday-მ გამოაქვეყნა. წერილი ჰერცოგინიამ მამას, ტომას მარკლს, 2018 წელს, ჰარისთან ქორწინების შემდეგ მისწერა. წერილის გასაჯაროების შემდეგ მეგანმა გამოცემას სასამართლოში უჩივლა.

ორი წლის შემდეგ დავა მეგან მარკლის გამარჯვებით დასრულდა. სასამართლომ გადაწყვეტილება გამარტივებული სამართალწარმოების წესით მიიღო, რადგან, მოსამართლის თქმით, განსხვავებული გადაწყვეტილების გამოტანის პერსპექტივა არ არსებობდა.

"მას ჰქონდა ობიექტური მოლოდინი, რომ წერილების შინაარსი დარჩებოდა კონფიდენციალური და ამის შესახებ სამყარო პრესის საშუალებით არ შეიტყობდა. მოპასუხის მიერ წერილის გამოქვეყნება მისი (მეგან მარკლის) პირადი ინფორმაციის არამართლზომიერად გამოყენების ფაქტს წარმოადგენს", — განმარტა მიღებული გადაწყვეტილება მოსამართლემ.

"2 წლის განმავლობაში მიმდინარე სასამართლო პროცესის შემდეგ მადლობელი ვარ, რომ სასამართლომ Associated Newspapers-სა და The Mail on Sunday-ს არამართლზომიერი და დამამცირებელი პრაქტიკის გამო შესაბამისი პასუხისმგებლობა დააკისრა", — განაცხადა მეგან მარკლმა.

წერილის გასაჯაროებას 2019 წელს სასექსის ჰერცოგი, პრინცი ჰარიც გამოეხმაურა:

"სამწუხაროდ, ჩემი ცოლი ბრიტანული ტაბლოიდის ერთ-ერთი ბოლო მსხვერპლია. ესაა უმოწყალო კამპანია პიროვნების წინააღმდეგ, რომელიც არ ცნობს შედეგებს და რომელიც ბოლო წლის განმავლობაში გამძაფრდა, მაშინ როცა ის ორსულად იყო და მაშინაც, როცა ის ჩვენს ახალშობილზე ზრუნავდა."

პრინცმა ჰარიმ მომხდარ ფაქტთან დაკავშირებით გარდაცვლილი დედა, პრინცესა დაიანაც გაიხსენა:

"ჩემი უდიდესი შიში ისტორიულად მეორდება. ერთხელ უკვე ვნახე, რა დაემართა ჩემს საყვარელ ადამიანს, რომელსაც აღარ ეპყრობოდნენ, როგორც პიროვნებას. მე დავკარგე დედა და ახლა ვუყურებ, როგორ აქცევენ ჩემს ცოლს მსხვერპლად იგივე გავლენიანი ძალები.

[დედაჩემის გარდაცვალების შემდეგ] ჭრილობა არ მოშუშებულა. მე, ამ ოჯახის წევრი, ამ როლის მატარებელი და ამ სამუშაოს შემსრულებელი, ყოველთვის, როდესაც ვხედავ კამერას, როდესაც მესმის მისი ჩხაკუნი, როდესაც ვხედავ ამ განათებას, წარსულში ვბრუნდები და დედა მახსენდება. ეს მისი გახსენების ყველაზე მტკივნეული გზაა."

ამავე თემაზე: