მურატ ჯიოევი, პოსტკონფლიქტური საკითხების დარეგულირებაში დე ფაქტო სამხრეთ ოსეთის პრეზიდენტის წარმომადგენელი აცხადებს, რომ უკანონოდ დაკავებულ ზაზა გახელაძეს ყველაზე მსუბუქი განაჩენი გამოუტანეს. როგორც იგი ამტკიცებს, გახელაძის საქმეს პროპაგანდისტული და ცრუ განცხადებებისთვის იყენებენ.

"საქართველოს მრავალხმიანი "ადვოკატების" გუნდის მიერ საერთოდ არ არის გათვალისწინებული, რომ საზღვრის გადაკვეთისთვის გახელაძის დაკავებისთანავე სამხრეთ ოსეთის შესაბამისმა უწყებებმა ამაზე ინფორმაცია გაავრცელეს, მათ შორის ის მუხლები, რომლის მიხედვითაც წარედგინა ბრალდება და რომლითაც სასამართლომ ყველაზე მსუბუქი განაჩენი გამოიტანა. არც ის გაუთვალისწინებიათ, რომ გახელაძის საკითხი ჟენევის დისკუსიებზე დ ინციდენტების პრევენციისა და მათზე რეაგირების მექანიზმის შეხვედრაზე არაერთხელ განიხილეს", — აცხადებს ჯიოევი.

ოკუპირებული ცხინვალის ე.წ. სასამართლომ, ზაზა გახელაძეს 12 წლითა და 6 თვით უკანონო პატიმრობა დღეს, 5 თებერვალს მიუსაჯა.

საოკუპაციო ძალების მიერ გასული წლის ზაფხულში დაკავებულ ზაზა გახელაძეს დე ფაქტო ხელისუფლებამ ბრალი წაუყენა რუსეთის სისხლის სამართლის კოდექსის ორი მუხლით — "სიცოცხლის ხელყოფის მცდელობა" და "სახელმწიფო საზღვრის უკანონოდ გადაკვეთა".

გახელაძე კასპში 11 ივლისს გაიტაცეს, მანამდე კი ცეცხლსასროლი იარაღით დაჭრეს. რუსული მხარის მტკიცებით, ზაზა გახელაძემ ცეცხლი პირველმა გახსნა. მათივე თქმით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა. თუმცა, რადიო თავისუფლების ინფორმაციით, სასამართლო პროცესზე ერთ-ერთმა მოწმემ თქვა, რომ ზაზა გახელაძეს დამიზნებით არ უსვრია.

გაიგეთ მეტი: