წითელმა ჯვარმა ოკუპანტების მიერ გატაცებული ზაზა გახელაძის წერილი ოჯახს გადასცა. როგორც მისმა ცოლმა, ირმა ბუთხუზმა On.ge-ს უთხრა, წერილიდან ირკვევა, რომ დაკავების დროს ფეხში მიყენებული ჭრილობა, ჯერ კიდევ მორჩენილი არ აქვს.

ფოტო: ირმა ბუთხუზი

როგორ ხარ ირმო, ბავშვები როგორ არიან. დამიკოცნე, უთხარი, მამიკოს უყვარხარ-თქო. დედა, მამა, დათო როგორ არიან. ყველა მომიკითხე. ყველანი მიყვარხართ. უფალს ვთხოვ, რომ მალე თქვენთან ვიყო. მოკითხვა ყველას. მე [ფეხი] ჯერ ვერ მომირჩა, მალე მორჩება, ალბათ, და გავივლი. ღმერთის წყალობით ყველაფერი კარგად იქნება.

ანანო მიყვარხარ

მარია მიყვარხარ

ირმას

ოკუპანტებმა ზაზა გახელაძე კასპში 11 ივლისს გაიტაცეს, მანამდე კი ცეცხლსასროლი იარაღით დაჭრეს. რუსული მხარის მტკიცებით, ზაზა გახელაძემ ცეცხლი პირველმა გახსნა. მათივე თქმით, გახელაძემ ჩვენებაში აღიარა, რომ საოკუპაციო საზღვარი მიზანმიმართულად გადაკვეთა.

ოკუპირებული ცხინვალის მტკიცებით, საოკუპაციო ძალების მიერ დაჭრილი და დაკავებული ზაზა გახელაძე კარანტინში გადაიყვანეს. ე.წ. ხელისუფლების სამხედრო პროკურორის, ტიგრან კაბულოვის თქმით, გახელაძე კარანტინში გადაიყვანეს, რათა დარწმუნდნენ, რომ კორონავირუსით ინფიცირებული არ არის.

გაიგეთ მეტი: ოკუპაციის პირისპირ — ზაზა გახელაძე და ირმა ბუთხუზი