ქართული ოცნების აღმასრულებელი მდივანი, მამუკა მდინარაძე გირჩი — მეტი თავისუფლების ლიდერის, ზურა ჯაფარიძის საკონსტიტუციო საჩივარს მიესალმება. ჯაფარიძე პარლამენტის მხრიდან მანდატების შეჩერებაზე უარის თქმის გამო სასამართლოში ჩივის.

"მივესალმებით ამ ნაბიჯს, იქიდან გამომდინარე, რომ მათ არ სჯერათ საერთაშორისო პარტნიორების, გასაგებია, რომ არ სჯერათ ქართული ოცნების. ამ შემთხვევაში რადგან საკონსტიტუციო სასამართლოში გაასაჩივრეს, სჯერათ საკონსტიტუციო სასამართლოსი, რომელიც დარწმუნებული ვარ იგივეს ეტყვის. იქედან გამომდინარე, რომ არის სამართლებრივი თემებიც, რაზეც ჩემი სუბიექტური აზრით, 2 აზრი ვერ იარსებებს, დისკრეცია არის დისკრეცია, საქართველოს პარლამენტის, რომელსაც შეუძლია, მიიღოს ერთი ან მეორე გადაწყვეტილება", — განაცხადა მდინარაძემ.

გირჩი — მეტი თავისუფლებას ლიდერმა, ზურაბ ჯაფარიძემ, მანდატების არშეჩერებასთან დაკავშირებით პარლამენტის მიერ მიღებული გადაწყვეტილება საკონსტიტუციო სასამართლოში გაასაჩივრა.

საპარლამენტო უმრავლესობამ 2 თებერვალს გადაწყვიტა, რომ ოპოზიციის მანდატებზე კენჭისყრა გადაიდება.