ქართული ოცნების პოლიტიკური საბჭოს წევრის, შალვა პაპუაშვილის განცხადებით, ისინი მზად არიან შეხვდნენ სამართლიანი არჩევნების წარმომადგენლებს, თუმცა ამასთანავე მნიშვნელოვნად მიაჩნიათ, რომ ორგანიზაციამ უზრუნველყოს ამ საკითხის გამჭვირვალობა.

"სამართლიანი არჩევნების წარმომადგენლებმა პრესკონფერენციაზე გამოთქვეს პრეტენზია ზოგიერთი უბნის შესწორების ოქმის მიმართ, თუმცა სამწუხაროდ, ჩვენი მრავალგზის მოწოდების მიუხედავად, ისინი დღემდე არ ასაჯაროებენ იმ კონკრეტულ ოქმებს, რომელთა მიმართაც მათ აქვთ პრეტენზია. ამის სანაცვლოდ სამართლიანი არჩევნების წარმომადგენლებმა გამოთქვეს მზადყოფნა, რომ შეხვდნენ ყველა დაინტერესებულ სუბიექტს და აუხსნან მათი პრეტენზიის არსი. საზოგადოებას აქვე შევახსენებ, რომ შესწორების ოქმი არის იგივე სამართლებრივი ძალის მქონე დოკუმენტი, როგორც თავდაპირველი შემაჯამებელი ოქმი და რომ მასაც ხელს აწერენ იგივე კომისიის წევრები, მათ შორის ოპოზიციის წარმომადგენლები. ჩვენ, რა თქმა უნდა, მზად ვართ შევხვდეთ სამართლიანი არჩევნების წარმომადგენლებს, თუმცა ამავე დროს მიგვაჩნია, რომ იმის გათვალისწინებით, თუ რა რეზონანსი მოჰყვა მათ თავდაპირველ მცდარ ინფორმაციას და შემდეგ მის ეტაპობრივ შესწორებას, მნიშვნელოვანია, რომ სამართლიანმა არჩევნებმა განსაკუთრებულად იზრუნოს ამ საკითხის გარშემო რაც შეიძლება მეტ გამჭვირვალობაზე. ყველა ის ინფორმაცია, რომელიც მათ სურთ, რომ დახურულ მოგვაწოდონ, ასევე, გახადონ საჯარო საზოგადოებისთვის. ამით ისინი საზოგადოების ინფორმირებასთან ერთად ეფექტიანად შეეწინააღმდეგებიან იმ დეზინფორმაციის კამპანიას, რომელსაც დღემდე ეწევა ზოგიერთი პოლიტიკური ჯგუფი, მათ შორის სამართლიანი არჩევნების ანგარიშის გამოყენებით", — განაცხადა პაპუაშვილმა.

სამართლიანი არჩევნების წარმომადგენლება 29 იანვარს განაცხადეს, რომ მათ ხელახლა გადაითვალეს საპარლამენტო არჩევნების 850 PVT უბანი და აღმოჩნდა, რომ შემაჯამებელი ოქმებში მეტობით დისბალანსი 8%-ს შეადგენდა. მათი განცხადებით, ოქმებში დისბალანსი საარჩევნო ადმინისტრაციამ უმეტესწილად კენჭისყრის დღის შემდეგ გაასწორა.

"ჩვენ გადავწყვიტეთ გამგეობამ და ISFED-ის ადმინისტრაციამ, რომ ხელახლა გადავგვეთვალა ყველა PVT უბანი, 850 უბანი. დაახლოებით 20 ადამიანზე მეტი სწავლობდა ამ მონაცემებს და შემიძლია გითხრათ, რომ მეტობით დისბალანსი შეადგენს 8%-ს. მიუხედავად იმისა, რომ PVT-ის უბნები რჩება საიდუმლოდ და არ არსებობს ამის პრაქტიკა ჩვენ ვაპირებთ, რომ დავუშვათ გამონაკლისი და ეს 8%-ის ოქმები დეტალურად გავიაროთ ცესკოსთან ან ნებისმიერ სხვა დაინტერესებულ პირთან ერთად, იმისთვის, რომ ყოველგვარი ეჭვი იქნას აღმოფხვრილი და ორგანიზაციამ დააკმაყოფილოს გამჭვირვალეობის მაქსიმალური სტანდარტი", — განაცხადა ორგანიზაციის გამგეობის წევრმა, ბაია პატარაიამ.

მისი თქმით, მეტობითი დისბალანსის გასწორება სხვადასხვა ეტაპზე სხვადასხვა საშუალებით ხდებოდა. პატარაიას შეფასებით, საქართველოში ამ მხრივ "ძალიან მახინჯი" პრაქტიკაა დამკვიდრებული, რაც ნიშნავს დისბალანსის აღმოფხვრას არა გადათვლის, არამედ ამ ოქმების ცვლილებას ახსნა-განმარტებების საფუძველზე. მისი განცხადებით, ორგანიზაცია მსგავს პრაქტიკას არ მიესალმება. პატარაიას თქმითვე, მარტო ISFED-მა 160 უბანზე მოითხოვა ხმების გადათვლა, თუმცა აქედან დაკმაყოფილდა მხოლოდ 16.