ბილაინმა თბილისის საქალაქო სასამართლოში გაასაჩივრა სახელმწიფო შესყიდვების სააგენტოს გადაწყვეტილება, რომლის მიხედვითაც მათ სახელმწიფოს კონსოლიდირებულ ტენდერში ვერ გაიმარჯვეს.

ბილაინის გენერალურმა დირექტორმა გიორგი ტყეშელაშვილმა გვითხრა, რომ ისინი ტენდერის ყველა მოთხოვნას აკმაყოფილებდნენ, მათ შორის 3G-ს ნაწილშიც.

"ერთ-ერთი ყველაზე მნიშვნელოვანი მიზანი, რის გამოც ეს გადაწყვეტილება მივიღეთ, არის ის, რომ დისკვალიფიკაციას არ ჰქონდა რეალური საფუძველი, იმიტომ რომ, ჩვენ ტენდერის ყველა პირობას ვაქვეყნებდით. ჩვენ რომ ეს პირობები არ დაგვეკმაყოფილებინა, საბუთებს არ შევიტანდით.

მათ ჩათვალეს, რომ ბილაინი ვერ აკმაყოფილებს ტენდერის მოთხოვნას 3G-ის ნაწილში, თუმცა ჩვენ ვთვლით, რომ ტენდერის პირობებს 3G-ის ნაწილშიც ვაკმაყოფილებთ. ამიტომ გადავწყვიტეთ გასაჩივრება.

თუ რაღაცაში არაა საქმე, გადაწყვეტილებას ერთ დღეში ვერ მიიღებდნენ" - აცხადებს ტყეშელაშვილი On.ge-სთან საუბრისას.

საქართველოს კომუნიკაციების ეროვნულ კომისიაში მიაჩნიათ, რომ ბილაინი (შპს მობიტელი) ვერ აკმაყოფილებს სახელმწიფო ტენდერში მონაწილეობის ერთ-ერთ პირობას. პირველ მარტამდე სახელმწიფო უწყებები კვლავ მაგთისა და ჯეოსელის მომსახურებით ისარგებლებენ.