2017 წლის 1 მარტამდე სახელმწიფო უწყებები კვლავ მაგთისა და ჯეოსელის მომსახურებით ისარგებლებენ. ამ კომპანიებმა გასულ წელს სატელეკომუნიკაციო მომსახურებაზე კონსოლიდირებულ ტენდერში გაიმარჯვეს. მათ ვადა 2017 წლის 31 იანვარს ეწურებოდათ.

აღნიშნულ კომპანიებთან თანამშრომლობის გაგრძელება მას მერე გადაწყდა, რაც 2017 წელს გამოცხადებულ ტენდერში გამარჯვებული ვერ გამოვლინდა. ვადის გაგრძელების გადაწყვეტილება სატენდერო კომისიამ მიიღო.

"შემჭიდროვებული ვადების გამო ზემოაღნიშნული ტენდერის ფარგლებში 2017 წლის 31 იანვრამდე ვერ მოესწროს გამარჯვებულ პრეტენდენტთან შესაბამისი შესყიდვის ხელშეკრულებების გაფორმება. ყოველივე ზემოაღნიშნულის შედეგად კი შემსყიდველი ორგანიზაციები ვერ შეძლებენ უწყვეტი მომსახურების მიღებას კონსოლიდირებული ტენდერით
გათვალისწინებული ტარიფების შესაბამისად," - წერია სატენდერო კომისიის ოქმში.

2017 წელს გამოცხადებულ კონსოლიდირებულ ტენდერში მხოლოდ ბილაინი (შპს მობიტელი) მონაწილეობდა. თუმცა, მასთან სახელმწიფო კომპანიები ხელშეკრულებას აღარ გააფორმებენ. ტენდერი უარყოფითი შედეგით დასრულდა.