ბილაინში (შპს მობიტელი) მიაჩნიათ, რომ კომპანია კონსოლიდირებულ ტენდერში მონაწილეობის ყველა პირობას აკმაყოფილებდა, მათ შორის, აბონენტებისთვის მესამე თაობის - 3G მომსახურების მიწოდებას. კომპანია სახელმწიფოს მიერ სატელეკომუნიკაციო მომსახურების შესაძენად გამოცხადებულ კონსოლიდირებულ ტენდერში მონაწილეობდა, თუმცა შესყიდვა უარყოფითი შედეგით დასრულდა.

ბილაინის პრესსამსახურის ინფორმაციით: „3G ტექნოლოგიით 2017 წლის მარტში დაიფარება მოსახლეობის 50 პროცენტი, ხოლო 2017 წლის ივნისის თვეში საქართველოს მოსახლეობის 70 პროცენტი.“ თუმცა, სატენდერო წინადადების მიხედვით, გამარჯვებული კომპანიის 3G/UMTS ქსელით მომსახურება, დაფარვის ზონის 90 პროცენტზე, ხელმისაწვდომი უნდა იყოს.

„სატენდერო დოკუმენტაციის მიხედვით, არ ყოფილა მოთხოვნა 3G ტექნოლოგიით საქართველოს ტერიტორიის სრულად დაფარვა... 90 პროცენტიანი დაფარვა მაგთის და ჯეოსელსაც არ აქვთ,” - აღნიშნავენ ბილაინში და მიაჩნიათ, რომ სატენდერო დოკუმენტებით 2G-ს, 3G-სა და 4G-ს ტექნოლოგიების ერთობლივი გამოყენებით საქართველოს მთელი ტერიტორიისა და დასახლებული ტერიტორიის 90 პროცენტის დაფარვით სატენდერო მოთხოვნებს აკმაყოფილებდნენ.

სახელმწიფო შესყიდვების სააგენტოზე სატელეკომუნიკაციო მომსახურების შესახებ ბოლო 5 წლის განმავლობაში განხორციელებული კონსოლიდირებული ტენდერების ნახვაა შესაძლებელი. ყველა ტენდერში, ბოლოს გარდა, მონაწილეობდნენ მაგთიკომი და ჯეოსელი, იშვიათად კი - ბილაინი. გამარჯვებული 2017 წლამდე ხან ჯეოსელი ხდებოდა და ხან მაგთიკომი.

ბოლო 5 წლის განმავლობაში სატელეკომუნიკაციო მომსახურების კონსოლიდირებულ ტენდერისთვის განაცხადების წარდგენის ყველაზე მცირე პერდიოანი მონაკვეტი 2017 წელს იყო. წელს შეთავაზებების წარდგენა 29 იანვარს დაიწყო და 25 საათში, 30 იანვარს დასრულდა. მანამდე ყველაზე მცირე პერიოდი, რომლის განმავლობაშიც კომპანიებს საკუთარი წინადადები უნდა წარედგინათ 40 საათი (2014 წელი) იყო.