ამერიკის არჩეული პრეზიდენტის, ჯო ბაიდენის მიერ ქვეყნის სახელმწიფო მდივნის პოსტზე დასახელებული კანდიდატის, ენტონი ბლინკენის განცხადებით, თუ საქართველო NATO-ს წევრობის კრიტერიუმს დააკმაყოფილებს, მაშინ NATO-ს კარი ქვეყნისთვის ღია უნდა დარჩეს. ამის შესახებ მან სენატის საგარეო საქმეთა კომიტეტზე ისაუბრა. ამის შესახებ ინფორმაციას ამერიკის ხმა ავრცელებს.

"თუ ქვეყანა, როგორიც საქართველოა, წევრობის კრიტერიუმს დააკმაყოფილებს და ჩვენს საერთო უსაფრთხოებაში წვლილს შეიტანს, დიახ, კარი ღია უნდა დარჩეს", — თქვა ბლინკენმა. (ამერიკის ხმის თარგმანი)

ერთ-ერთი სენატორის ჩაკითხვას კი, რომ საქართველოს NATO-ს წევრობა რუსეთთან ომს გამოიწვევდა, ბლინკენმა უპასუხა, რომ რუსეთი აგრესიულია იმ ქვეყნების წინააღმდეგ, რომლებიც წევრები არ არიან.

"სიმართლე გითხრათ, საწინააღმდეგოს ვფიქრობ. როცა საქმე ნატოს წევრობას ეხება, არსებობს საკმარისი მტკიცებულება იმისა, რომ რუსეთი აგრესიულია იმ ქვეყნების წინააღმდეგ, რომლებიც ნატოში არ არიან და [უსაფრთხოების] ქოლგის ქვეშ არ არიან მოქცეული. ეს აჩვენებს იმას თუ რატომ არ ესხმის თავს რუსეთი [ნატოს წევრებს]", — განაცხადა ბლინკენმა.

არჩეულმა პრეზიდენტმა, ჯო ბაიდენმა სახელმწიფო მდივნის თანამდებობაზე ენტონი ბლინკენი 23 ნოემბერს დაასახელა. იგი ბარაკ ობამას პრეზიდენტობის დროს სახელმწიფო მდივნის მოადგილედ მუშაობდა. გარდა ამისა, ბაიდენის მრჩეველიც იყო. აღნიშნულ პოსტზე მის წარდგენასთან დაკავშირებით ამერიკულ მედიაში დიდი ხანი საუბრობდნენ.