სტრატეგია აღმაშენებლის ლიდერი, გიორგი ვაშაძე აცხადებს, რომ გირჩთან და მოქალაქეებთან ინდივიდუალურ შეხვედრებს არ გამართავს.

"ეს შეხვედრა არ იქნება. ერთი მხრივ, თვითიზოლაციაში ვარ და მეორე მხრივ, ვფიქრობ, რომ ყველაფერი განხილულ უნდა იყოს საერთო ფორმატში", — განაცხადა გიორგი ვაშაძემ პალიტრანიუსის ეთერში.

ვაშაძე გამოეხმაურა თავად იმ იდეასაც, რისი განხილვაც გირჩსა და მოქალაქეებს სხვა ოპოზიციურ პარტიებთან ინდივიდუალურ შეხვედრებზე სურთ. ამ წინადადების მიხედვით, 2021 წლის ადგილობრივი თვითმმართველობის არჩევნები განხილული უნდა იყოს, როგორც პლებისციტი ვადამდელ არჩევნებთან დაკავშირებით — თუ ამ არჩევნებში ოპოზიცია გაიმარჯვებს, უნდა ჩატარდეს ვადამდელი საპარლამენტო არჩევნები, თუ მმართველი პარტია — ვადამდელი საპარლამენტო არჩევნების ჩატარებას აზრიც ეკარგება.

ვაშაძე მიიჩნევს, რომ ოპოზიციამ უკვე ბევრი ალტერნატივა შესთავაზა ხელისუფლებას და ახლა ჯერი ქართულ ოცნებაზეა.

"ჩვენ მივედით ხელახალი არჩევნებით; მერე წავედით არა ხელახალ, არამედ რიგგარეშე არჩევნებზე; რიგგარეშე არჩევნების ალტერნატივად ვთქვით კიდევ პლებისციტი; ვთქვით თარიღები, რომ გაზაფხული კი არა შემოდგომა. ასე მოლაპარაკებები არასდროს არ იმართება, პირდაპირ მინდა ვთქვა და არ არასდროს ასე მოლაპარაკებები არ მიმდინარეობს. ბარემ, ყოველ ჯერზე ჩვენ თვითონ ვთქვათ, რომ ახლა ამისთვის ვართ მზად, ახლა იმისთვის ვართ მზად, ახლა ამას შევცვლი, ახლა იმას შევცვლი", — ამბობს გიორგი ვაშაძე.

14 იანვარს, გირჩსა და მოქალაქეებს შორის ინდივიდუალური კონსულტაცია გაიმართა. სწორედ ეს ორი პარტია განიხილავს აქტიურად 2021 წლის ადგილობრივი თვითმმართველობის არჩევნების პლებისციტად განხილვის შესახებ. ისინი აცხადებდნენ, რომ ამის შესახებ ინდივიდუალურ მოლაპარაკებებს სხვა პარტიებთანაც გამართავდნენ.

გაიგეთ მეტი: