პარტია მოქალაქეებსა და გირჩს შორის ცალკე კონსულტაცია იმართება. ორი ოპოზიციური ძალა, რომელსაც მანდატების გაუქმებაზე ჯერ პარლამენტისთვის არ მიუმართავს, ერთმანეთს ამ წუთებში ხვდება.

როგორც პარტიების ლიდერებმა, ალეკო ელისაშვილმა და იაგო ხვიჩიამ შეხვედრის დაწყებამდე განაცხადეს, მათი შეთავაზებაა, რომ რიგგარეშე არჩევნები იმ შემთხვევაში მოითხოვონ, თუ თვითმმართველობის არჩევნებში ქართული ოცნება დამარცხდება.

"ვთავაზობთ ასეთ გამოსავალს, რომ ახალი არჩევნები მოვითხოვოთ მაშინ, თუ ოპოზიცია იგებს ადგილობრივი თვითმმართველობის არჩევნებს. მგონი, ეს გასაგები და ბუნებრივი პირობებია. თუ ეს პირობა მომგებიანია ქართული ოცნებისთვის და მიუხედავად იმისა, რომ ბიძინა ივანიშვილი წავიდა, გასწორდა საარჩევნო კოდექსი და მაინც მოიგეს, დიახ მათ უფლება აქვთ, შემდეგი 4 წელი მართონ ქვეყანა", — განაცხადა ხვიჩიამ.

რაც შეეხება ალეკო ელისაშვილს, იგი ამბობს, რომ მზადაა კონსულტაცია გამართოს ყველა იმ ოპოზიციურ პარტიასთან, ვისაც "გამბედაობა ეყოფა", მიიღოს "თამამი" გადაწყვეტილება.

"უსასრულოდ გაიწელა მეხუთე რაუნდი, როდის იქნება არ ვიცით. ამასობაში დაგვემხო ქვეყანა თავზე [...] ჩვენი პოზიციაა, რომ შეიძლება მეხუთე რაუნდის გარეშე, მაგრამ ელჩების თანდასწრებით, თუ ქართული ოცნება ხელს მოაწერს იმას, რასაც ჩვენ ვითხოვთ, მაშინ მზად ვართ, შევიდეთ პარლამენტში [...] თუ თვითმმართველობაზე ხმების ჯამური რაოდენობით ვაჯობებთ ქართულ ოცნებას, ეს იყოს პლებისციტი", — განაცხადა მან.

• არ გამოვრიცხავთ ქართულ ოცნებასთან მოლაპარაკებებზე ცალკე დავსხდეთ — ელისაშვილი

საქართველოში 31 ოქტომბერს საპარლამენტო არჩევნები ჩატარდა. პირველი ტური ცხრა პარტიამ გადალახა. მათგან, 8 ოპოზიციურმა ძალამ არჩევნების შედეგები ლეგიტიმურად არ სცნო, მეორე ტურში მონაწილეობა არ მიიღო და მანდატების გაუქმება მოითხოვა. სადეპუტატო უფლებამოსილების შეწყვეტის შესახებ პარლამენტს გირჩისა და მოქალაქეების გარდა ყველა პარტიამ მიმართა. მათ შორის, გირჩი — მეტი თავისუფლების ლიდერმა, ზურაბ ჯაფარიძემაც.

სადეპუტატო უფლებამოსილება ვადამდე შეუწყდა პატრიოტთა ალიანსის 3 წევრს — ირმა ინაშვილს, გიორგი ლომიასა და გოჩა თევდორაძეს. პატრიოტთა ალიანსის სიით მათ ნაცვლად პარლამენტში შევიდნენ დავით ზილფიმიანი, ფრიდონ ინჯია და გელა მიქაძე. პარლამენტში შესვლასთან ერთად მათ პარტია დატოვეს და ახალი პოლიტიკური ძალა — ევროპელი სოციალისტები დააფუძნეს.