გირჩის ერთ-ერთი ლიდერის, ვახტანგ მეგრელიშვილის თქმით, ცუდია, რომ 31 ოქტომბრის საპარლამენტო არჩევნები გაყალბდა, თუმცა, ის აღნიშნავს, რომ წინა არჩევნებიც გაყალბდა და სწორედ მასშტაბური პრობლემის აღმოსაფხვრელად არის მნიშვნელოვანი ძირეული ცვლილებების განხორციელება.

"სრულად პროპორციული ქვეყანა, ზოგადად და დაბალი ბარიერი არის ჩვენი 30-წლიანი პრობლემის გადაწყვეტის გზა. ის, რომ ეს კონკრეტული არჩევნები გაყალბდა, საშინელებაა, ძალიან ცუდია, მაგრამ ამ ქვეყანაში ყველა წინა არჩევნები გაყალბდა. მაშინ, როცა ოპოზიციონერები, ჩემი კოლეგები, ერთიანობს რომ გვთხოვენ, არიან მონაწილე პროცესის, რომელშიც მათ მკაფიოდ ვერ დაადასტურეს ამ არჩევნების იმგვარი გაყალბება, რომ ფასილიტატორებს და საერთაშორისო საზოგადოებას ერთმნიშვნელოვანი პოზიცია ჩამოაყალიბებინათ", — აცხადებს მეგრელიშვილი.

ოპოზიციური პარტიები 2020 წლის 31 ოქტომბერს ჩატარებული საპარლამენტო არჩევნების შედეგებს არ აღიარებენ. მათ არჩევნებს მეორე ტურში მონაწილეობასა და საპარლამენტო მანდატებზე უარი თქვეს.

ქართულ ოცნებაში აცხადებენ, რომ ბარიერგადალახულ რვა პარტიას შორის, პატარა პარტიები დიდი პარტიების გავლენისა და ბულინგის ქვეშ არიან.

პოლიტიკური კრიზისის განსამუხტად, მმართველ პარტიასა და ოპოზიციას შორის მოლაპარაკებები აშშ-სა და ევროკავშირის ელჩების შუამავლობით მიმდინარეობს. უკვე გაიმართა მოლაპარაკების ოთხი ეტაპი, თუმცა, შეთანხმება კვლავ ვერ შედგა და პარლამენტი ერთპარტიულად აგრძელებს მუშაობას. მოლაპარაკებების მომდევნო ეტაპი, სავარაუდოდ, იანვრის ბოლომდე გაიმართება.