მრბოლელ მტრედს, რომელმაც აშშ-დან ავსტრალიამდე 13 000 კილომეტრის გადაფრენას გაუძლო, კარანტინის რისკების გამო დააძინებენ.

დაღლილი ფრინველი, მელბურნში, კევინ სელი-ბერდის ეზოში გამოჩნდა, მას შემდეგ, რაც ორეგონის შტატში გამართული რბოლიდან 29 ოქტომბერს გაუჩინარდა.

ექსპერტები ეჭვობენ, რომ მტრედი, რომელსაც სელი-ბერდმა ჯო დაარქვა, ავსტრალიამდე სატვირთო ხომალდს დაემგზავრა. კევინის თქმით, ავსტრალიის საკარანტინო და ინსპექციის სერვისი დაუკავშირდა და ფრინველის დაჭერა დაავალა, მას შემდეგ, რაც მისი კონტინენტზე შემოსვლა მედიამ გააშუქა.

"ისინი ამბობენ, რომ თუ ჩიტი ამერიკიდან არის, ფრინველთა დაავადებების რისკი არსებობს. აინტერესებდათ, შემეძლო თუ არა დახმარება, ვუთხარი, რომ დაჭერა არ შემიძლია, რადგან 500 მილიმეტრის დისტანციაზე ვუახლოვდები და მოძრაობას იწყებს", — განაცხადა სელი-ბერდმა. მისი თქმით, უწყება პროფესიონალ ფრინველის დამჭერთან დაკავშირებას აპირებს, თუმცა საკარანტინო სერვისს კომენტარი არ გაუკეთებია.

ჯო და კევინი

სელი-ბერდის თქმით, ოკლაჰომაში არსებულმა ამერიკული მტრედების გაერთიანებამ დაადასტურა, რომ ჯოს პატრონი ალაბამიდან არის. მან ფრინველის პატრონთან დაკავშირება სცადა, მაგრამ ვერ შეძლო. მტრედი დღეებს ეზოში ატარებს, ზოგჯერ ადგილობრივ მტრედებს ჩამოუჯდება. კევინი მას რეგულარულად აჭმევს.

"საკვებს არ ვაკლებ, წყალიც აქვს და ალბათ ჩათვალა რომ სახლშია", — ამბობს სელი-ბერდი.

ავსტრალიის ეროვნული მტრედების ასოციაციის წარმომადგენელმა, ბრედ ტერნერმა განაცხადა, რომ ჩინური მრბოლელი მტრედების ავსტრალიაში ჩაფრენამდე სმენია, რაც ბევრად ნაკლები მანძილია.

2015 წელს, ჯონი დეპისა და მისი ყოფილი პარტნიორის, ამბერ ჰერდის იორკშირ ტერიერებიც აღმოჩნდნენ რისკის წინაშე. წყვილმა ძაღლები ჩუმად შეაპარა ქვეყანაში, რის შემდეგაც ხელისუფლებამ ცხოველების დაძინების მუქარა გააჟღერა და წყვილს ქვეყნის დასატოვებლად 50-საათიანი ვადა მისცა. წყვილმა საჯარო ვიდეო მიმართვის საშუალებით მოიბოდიშა.