დაავადებათა კონტროლის ცენტრის ხელმძღვანელის მოადგილის, პაატა იმნაძის განცხადებით, ქვყანას ამ წუთებში Pfizer-ის ვაქცინის 200 ათასი დოზის მიღების შესაძლებლობა აქვს. ამის შესახებ მან საკოორდინაციო საბჭოს სხდომის შემდეგ განაცხადა.

"კოვაქსის პლატფორმიდან, იქ, გადახდიალია წინასწარი შენატანი სადაც, ქვეყანა იყიდის [ვაქცინას]. ქვეყანა ასევე მზად არის, თუ ვინმე მოგვაწვდის პირდაპირ ამ ვაქცინას, ვიყიდოთ პირდაპირ მწარმოებლისგან", — აღნიშნა იმნაძემ და დაამატა, რომ ამ ეტაპისთვის პირდაპირ ყიდვა შეუძლებელია.

გუშინ, 13 იანვარს ჯანდაცვის მინისტრმა, ეკატერინე ტიკარაძემ განაცხადა, რომ უახლოეს მომავალში საქართველოში მოსახლეობის აცრა Pfizer-ის ვაქცინით გახდება შესაძლებელი.

Pfizer-BioNTech-ის ვაქცინას იყენებენ აშშ-ში, დიდ ბრიტანეთში, კანადასა და ევროკავშირის ქვეყნებში. ის დამტკიცებულია ჯანდაცვის მსოფლიო ორგანიზაციის მიერაც.

10 იანვარს ინფექციური საავადმყოფოს დირექტორმა, თენგიზ ცერცვაძემ განაცხადა, რომ საქართველოში ორი ვაქცინის — AstraZeneca და ერთ-ერთი ჩინური ვაქცინის შემოტანა განიხილება.

მოგვიანებით ჯანდაცვის მინისტრის მოადგილემ, თამარ გაბუნიამ განმარტა, რომ ჩინური ვაქცინის შემოტანა საქართველოში ჯერ არ განიხილება, რადგან ის არაა აღიარებული არცერთი მკაცრი მარეგულირებლისა და WHO-ს მიერ. მისივე თქმით, ამ ეტაპზე Pfizer-ის, AstraZeneca-სა და Moderna-ს ვაქცინები განიხილება.

როგორც ჯანდაცვის უწყებაში აცხადებენ, საქართველოს ვაქცინის 1,4 მილიონი დოზა აქვს შეკვეთილი.